Astanada sal aýrýyna shaldyqqan balalardy ońaltý jónindegi baǵdarlama tanystyryldy
«Deni saý bala - ult bolashaǵy» baǵdarlamasy aıasynda úsh jasqa deıingi balalarǵa keshendi kútim jasalady. Tirek-qımyl apparattary zaqymdanǵan balalardy erte jastan saýyqtyrý - onyń psıhıkalyq, sondaı-aq fızıkalyq turǵydan der kezinde damýyna kómektesedi.
Joba aıasynda elimizdiń 10 aımaǵynyń 14 EFM dárigerin jańa ádistemelermen oqytý uıymdastyryldy. Sondaı-aq, jańa tehnologııalar boıynsha ońaltýdy júrgizýdiń normatıvteri bekitildi.
Budan basqa, «Qasıetti Jol» qaıyrymdylyq qorynyń qoldaýymen respýblıkamyzdyń 6 aımaǵynda balalar úılerine jalpy somasy 7,5 mln. teńgeni quraıtyn jańa ońaltý qondyrǵysy satyp alyndy. Búgin Astanada Baldyrǵandar úıinde ońaltý qondyrǵysynyń tanystyrylymy ótti.
«Bizdiń dárigerler eki jyldan beri balalarmen jumys isteıdi. Sapaly qural-jabdyq satyp alǵaly ári syrqat balalardy erte jastan keshendi oqytýdyń arqasynda oń nátıjelerge qol jetkize bastadyq. Ortalyqta sal aýrýy dıagnozy qoıylǵan úsh balany meıirimdi jandar asyrap aldy. Tirek-qımyl apparaty zaqymdanǵan balalardy der kezinde ońaltqan jaǵdaıda olar qoǵamnyń bir múshesi retinde ómir súrip kete alady», - deıdi «Nur Otan» partııasynyń 50 tulǵasy» jobasynyń qatysýshysy Gúlnar Qulysheva.
Onyń aıtýynsha, «Deni saý bala - ult bolashaǵy» jobasynyń arqasynda 16 balanyń 10-y oń nátıjege qol jetkizgen. Atap aıtqanda, aýrýdyń klınıkalyq kóriný aýyrtpalyqtary, onyń ishinde bulshyq et spastıkasy men gıperkınezasy tómendep, balalardyń sóıleý qabileti, damýy men psıhologııalyq minez-qulqy dınamıkasy artty.
Aıta keteıik, sal aýrýymen aýyratyn 3 jasqa deıingi balalardy ońaltý baǵdarlamasy mamandandyrylǵan Balalar úılerinde alǵash ret engizilip otyr. Aldaǵy ýaqytta joba respýblıkamyzdyń 10 aımaǵynda engizilmek.
Joba Qazaqstan Respýblıkasy Densaýlyq saqtaý mınıstrligi men Astana qalasy Densaýlyq saqtaý basqarmasynyń qoldaýymen júzege asyrylýda.