Astanada saqtaý merzimi ótip ketken azyq-túliktermen oqýshylardy tamaqtandyrǵan
ASTANA. QazAqparat - Astanada Katar memleketin damytý qorynyń qoldaýymen salynyp, 2018 jyldyń qyrkúıeginde ashylǵan №85 mektep-lıtseıdiń ata-analary áleýmettik jelilerde buzylǵan lımondar, shoshqa etinen jasalǵan shujyqtar men saqtaý merzimi ótip ketken azyq-túlikterge shaǵymdandy, dep habarlaıdy Elorda Info.
«85 mektep-lıtseıdiń ata-analary balalarynyń ishteri aýyryp qusqandaryn aıtyp, tamaqtyń sapasyna shaǵym túsirgennen keıin bul máseleni kóterip otyrmyz. Komıssııa ashanada tekserý júrgizdi, barlyǵy sýretter men vıdeoda tur. Balyq pen kúrish Qytaıda óndirilgen, azyq-túlikterdiń saqtaý merzimi ótken jáne sapasy tómen, shujyqtar shoshqa etinen jasalǵan jáne t.b. Osylarmen bastaýysh synyptyń oqýshylaryn tamaqtandyrýda», - dep jazdy «Astana - Ne? Qaıda? Qashan?» tobynda Facebook qoldanýshysy Raýshan Nurǵalımova
Elordadaǵy bilim berý basqarmasy osy faktilerdi tekserdi. Azyq-túlik jetkizýshilermen, ana-analar qoǵamdastyǵy jáne mektep ákimshiligimen kezdesý uıymdastyryldy.
«Ata-analardyń shaǵymyndaǵy barlyq faktiler rastaldy. Kezdesý qorytyndysy boıynsha jetkizýshilerge bolashaqta osyndaı buzýshylyqtarǵa jol bermeý jáne osyndaı faktilerdi boldyrmaý boıynsha qabyldanǵan sharalar týraly habarlandy. Mektep ákimshiligine bolashaqta tamaqtyń sapasyn tekserý jáne azyq-túlikterdi saqtaý sharalaryn baqylaý boıynsha sarapshylyq komıssııa jumysyn kúsheıtý tapsyryldy», - dep jaýap berdi bilim berý basqarmasynda.
Vedomstvonyń baspasóz qyzmetiniń habarlaýynsha, ótken oqý jylynan bastap Astanadaǵy mektep ashanalarynda ata-analar qoǵamdastyǵynyń ókilderimen birlesip monıtorıng júrgizilýde.
«Ata-analardyń belsendiliginiń arqasynda kóptegen ózgerister oryn alyp jatyr. Barlyq mektepterde tamaqtaný sapasyn baqylaıtyn sarapshylyq komıssııa jumys isteýde. Oǵan mektep qyzmetkerleri, medıtsına mamandary, sondaı-aq ata-analar qoǵamdastyǵynyń ókilderi kiredi», - dep atap ótti bilim berý basqarmasynyń baspasóz qyzmetinen.
Belgili bolǵandaı, osy mekteptegi balalardy tamaqtandyrýmen aınalysatyn kompanııa ókilderine ashanany jabdyqtaýǵa 15 mln teńge salynǵan. Oqý orny Astanada jańa oqý jylynyń basynda saltanatty túrde ashylǵan. Birinshi qyrkúıek kúni oǵan Memleket basshysy barǵan bolatyn.
