Astanada sakraldy oryndardyń kartasy jasalady
Baǵdarlama jobalarynyń arasynda elordanyń tarıhı-mádenı muralaryn biriktiretin «Sakraldy Astana» kartasy da bar, dep habarlandy Astana ákimdiginiń saıtynda.
Ermek Amanshaev Astana aýmaǵynda kóne túrki kezeńine jatatyn arheologııalyq nysandardyń bar ekenin atap ótti. Barlyq eskertkishter «sakraldy kartaǵa» enýi tıis jáne tarıhı-mádenı muralardy tereńirek zertteý úshin quramyna arheologtar, tarıhshylar, úkimettik emes jáne jastar uıymdarynyń ókilderi enetin jumys tobyn qurý qajet.
«Sakraldy karta - bir jaǵynan ólke tarıhyn zertteýdiń baǵa jetpes kózi jáne ekinshi jaǵynan - óz jerińe, astanańa degen patrıottyq qarym-qatynasty qalyptastyrýdyń negizi. Úshinshiden, sakraldy karta týrıstik klasterdiń aınymas bólshegine aınalýy tıis», - deıdi Ermek Amanshaev.
Ákim orynbasary «Rýhanı jańǵyrý» boıynsha jumystardy jandandyrý qajettigin basa aıtty jáne baǵdarlamada aıtylǵan barlyq baǵyttardy júzege asyrýǵa arnalǵan is-sharalardy sanamalap berdi. Máselen, «Bozoq» qalashyǵyna mádenı-ǵylymı ekspedıtsııa, qalalyq slet jáne jas ólketanýshylar forýmy, bilim berý uıymdarynda «Týǵan jer - rýhanı jańǵyrý» atty synyp jáne kýratorlyq saǵattar ótkizý jáne ózge de sharalar kózdelip otyr.
Sonymen birge, jınalysta «Rýhanı jańǵyrý» Astananyń jas patrıottar klýbyn jáne qalanyń shyǵarmashyl zııalylarynyń keńesin qurý ıdeıasy aıtyldy. Bastamashyl toptarǵa mádenıettanýshylar, tarıhshylar, óner qaıratkerleri, arheologtar jáne qalanyń jasampaz daryndy jastary enedi.