Astanada Sáken Seıfýllınniń 15 metrlik portreti salyndy
ASTANA. QazAqparat - Astanalyqtardyń kóbisi jańa úlgide salynǵan portrettiń mán-maǵynasyn túsinbeıdi. Al úlken kisiler áp-ádemi sýretti «búldirip tastaǵany» úshin sýretshilermen sózge kelip qalatyn kórinedi, dep xabarlaıdy QazAqparat tilshisi.
«Iá, keıbir kisiler urysyp ketedi. Bizdi vandal dep oılaıdy. Óıtkeni biz bas kezinde Sáken Seıfýllınniń kádimgideı portretin salyp shyqtyq. Endi, ústinen núktelerdi salyp jatyrmyz. Sodan úlken kisiler portretti «búldirip jatyr» dep oılaıdy. Negizi, bul da sýret salýdyń bir stıli. Ony «neopoıntılıstik stıl» dep ataýǵa bolady. Ondaıda myńdaǵan núktelerden bir sýret shyǵady. Bul degenimiz, árbir adam tarıxtyń bir bólshegi ispettes. Al bárin qosqanda tutas bir tarıx, tutas bir portret, xalyqtyń ulttyq kody shyǵady», - deıdi sýretshi Stepan Krasnov.
Onyń aıtýynsha, jaqyn jerden Sáken Seıfýllınniń portreti anyq kórinbeýi múmkin. Alaıda alystan tamasha kartına bolyp shyǵady.
«Osy portretti salýǵa bes kúndeı ketetin shyǵar. Biz aldymen eskızin jasadyq. Odan keıin myna jaqta komıssııa qarady. Sosyn xalyq daýys berdi. Sóıtip, osy sýretti tańdady. Bir-eki kúnde aıaqtap qalamyz. Portret tolyǵymen núktelermen boıalady», - dedi S.Krasnov QazAqparat tilshisine bergen suxbatynda.
Stepannyń ózi Máskeýden keldi. Odan bólek, Astanada Tatarstannyń, tipti Frantsııa men Italııanyń sýretshileri úılerdiń qabyrǵalaryna óz týyndylaryn salýda.
Máselen, Sáken Seıfýllın kóshesiniń bas jaǵynda barystyń ádemi sýretin salyp qoıdy. Bas kezinde qabyrǵany tolyǵymen kók túske boıap tastaǵanda jergilikti turǵyndar túsinbeı qalǵan. Baıbalam salyp, shaǵym túsirgender de bolypty. Alaıda qazir barlyǵy dán rıza.
Al Іlııas Esenberlın kóshesiniń boıynda turǵan úıdiń qabyrǵasyna qazaq qyzynyń sýretin saldy. «Ol jer-jahannyń tarıxyn jazyp otyr», - deıdi avtorlar.
Jalpy, búginde osy ispetti ónerge suranys joǵary. Máselen, kúni keshe ǵana Astanadaǵy bir úıdiń qabyrǵasyna sýret salǵan jigit búgin Portýgalııada júr. Ol jaqtan da mańyzdy bir tapsyrys túsken kórinedi.
Aıta keteıik, elordada Urban Art Astana festıvali ótýde. Sonyń aıasynda qazaqstandyq jáne sheteldik sýretshiler úılerdiń qabyrǵalaryna óz týyndylaryn salyp júr.
