Astanada sadaq jasaıtyn sheberler jamby atý sportyn damytýdy talqylady (FOTO)
ASTANA. QazAqparat - Astanada elimizdegi etnıkalyq «Jamby atý» sportyn damytý maqsatynda «Jamby atý» sportyn damytý joldary: ulttyq sadaq-jebe jasaý jáne kıim úlgisi» atty semınar-keńes uıymdastyryldy.
Atalmysh jıynǵa QR Ulttyq sport túrleri qaýymdastyǵynyń prezıdenti Bekbolat Tileýhan, Qazaqstan Respýblıkasy Prezıdenti janyndaǵy Qazaqstannyń strategııalyq zertteýler ınstıtýtynyń dırektory Erlan Qarın, «Nur Otan» partııasy Tóraǵasy Birinshi orynbasarynyń keńesshisi Berik Ýálı jáne ulttyq sadaq atý ónerin zerttep júrgen etnograf-ǵalymdar men qazirgi tańda etnıkalyq jaq-sadaq túrlerin jasap júrgen sheberler qatysty.
Semınar-keńestiń maqsaty - qazirgi tańda elimiz kóleminde etnıkalyq sadaq jáne jebe jasap júrgen sheberlerdiń basyn qosyp, tájirıbe almasý. Semınar barysynda Qazaq jaýyngerleri qandaı jaq (sadaq) jáne nendeı jebe túrlerin paıdalanǵany jaıly qundy oılar aıtyldy. Osyndaı sharalar jamby atý sportynyń baıyrǵy jaýyngerlik óner retindegi etnotanymdyq mańyzyn túsindirýde úlken ról atqarady. Bolashaqta jamby atý sportyn damytý úshin atys túrlerin (at ústinde qozǵalysta atý, at ústinde qozǵalyssyz atý, jaıaý júris-júgiris barysynda atý t.b.) naqtylap, osy ádisterge saı sadaq túrlerin tańdaý josparlanǵan, dep habarlaıdy nurotan.kz.
