Astanada sabaq ýaqytynda smartfon qoldanbaıtyn oqýshylar qatary artyp keledi

ASTANA. KAZINFORM - Astana qalasy Bilim basqarmasynyń bastamasymen 2021 jyldan «Smartfonsyz mektep» jobasy qolǵa alyndy. Bes jyl ishinde jobaǵa qatysqan mektepter sany kóbeıip qana qoımaı, sabaq ýaqytynda smartfon qoldanbaıtyn oqýshylar qatary aıtarlyqtaı artyp keledi, dep habarlaıdy elorda ákimdiginiń resmı saıty.

Ásirese, joǵary synyp oqýshylary uıaly telefonnyń bilim alýǵa kedergi keltiretinin túsinip, mektep qabyrǵasynda gadjetsiz júrýge daǵdylana bastaǵan.

Sonyń ishinde №82 «Daryn» mamandandyrylǵan lıtseıi basshysynyń tárbıe isi jónindegi orynbasary Lázzat Tájdenqyzynyń sózinshe, buryn úzilis kezinde oqýshylardyń basym bóligi ýaqytyn telefonǵa úńilýmen ótkizse, qazir olardyń qolynan kitap jıi kórinedi.

«Oqýshylarymyz gadjetten alystaǵaly beri bilim sapasynda da oń ózgerister baıqala bastady. Balalar bir-birimen kóbirek sóılesedi, sabaqqa zeıini artty», – deıdi ol.

Joba aıasynda kóptegen mektepterde arnaıy tártip engizilgen. Oqýshylar sabaq bastalar aldynda uıaly telefondaryn arnaıy uıashyqtarǵa nemese saqtaýǵa arnalǵan oryndarǵa tapsyrady. Sabaq aıaqtalǵan soń ǵana qurylǵylaryn qaıta alady. Bul tásil oqýshylardyń nazaryn tek oqý protsesine baǵyttaýǵa múmkindik beredi.

Qazirgi tańda elorda mektepteriniń barlyǵynda derlik «Smartfonsyz mektep» jobasy engizilgen.

Resmı derekterge sáıkes, qala mektepteriniń shamamen 40% paıyzynda oqýshylar sabaq barysynda telefon qoldanýdan bas tartqan. Bul kórsetkish aldaǵy ýaqytta da ulǵaıa túsýi múmkin.

Osylaısha, «Smartfonsyz mektep» bastamasy – zamanaýı bilim berý keńistiginde tárbıe men tártipti ushtastyra otyryp, oqýshynyń sapaly bilim alýyna jaǵdaı jasaýǵa baǵyttalǵan mańyzdy qadamdardyń biri.

Aıta keteıik, Almatydaǵy mektepte alty oqýshy tútinnen ýlandy.