Astanada «Rýxanı jańǵyrý» baǵdarlamasynyń bir jyldaǵy jumysy talqylanýda
Shara aıasynda árbir jobanyń nátıjesi boıynsha arnaıy stendter qoıylyp, atqarylǵan jumystyń qorytyndysy jarııalanyp otyr.
QR Prezıdenti Ákimshiligi Іshki saıasat bóliminiń meńgerýshisi Aıda Balaevanyń aıtýynsha, búgingi jınalystyń basty maqsaty - ótken bir jyldyń ishinde atqarylǵan jumysty talqylap qana qoımaı, ony ary qaraı tıimdi jalǵastyrý.
"Sondyqtan búgin árbir baǵytta atqarylǵan jumystyń nátıjesin tyńdap, odan keıin osy jerde ashyq áńgime jasaýymyz qajet. Óıtkeni árqaısyńyzda keremet usynystaryńyz, oıda júrgen jaqsy jobalaryńyz bar. Osy rýxanı jańǵyrýdy ary qaraı xalyqqa qalaı jetkizemiz? Sebebi baǵdarlamaǵa elimizdiń árbir azamaty qatyssa ǵana onyń nátıjesi tıimdi bolady. Osyny Elbasy da únemi aıtyp otyrady. Sondyqtan alda áli de jumys kóp. Baǵdarlamany barynsha qyzyqty etý kerek. Eń bastysy, qomaqty nátıje bar. Ony kúni keshe bir ǵana jobanyń aıasynda kórip tamashaladyńyzdar. Endi, osynyń bárin ary qaraı elge jetkizý siz ben bizdiń basty maqsatymyz dep bilemin", - dep atap kórsetti A.Balaeva.
Sondaı-aq bólim meńgerýshisi "Bolashaqqa baǵdar: rýxanı jańǵyrý" baǵdarlamasyn iske asyrýda jýrnalısterdiń eńbegin erekshe atap ótti.
"Shynynda, baǵdarlamanyń árbir jobasy bólek memlekettik baǵdarlamaǵa saı keledi. Sonyń bárine xalqymyz belsendi atsalysyp keledi. Osy oraıda buqaralyq aqparat quraldarynyń ókilderine jeke alǵysymdy bildirgim kelip otyr. Óıtkeni synı materıaldardyń ózi biz úshin úlken ádistemelik qural sııaqty boldy. Biz óz jumysymyzdy jandandyryp, ony basqa baǵytta durystap jasaýǵa tyrystyq. Árbir jobanyń mazmunyn ashyp, xalyqqa jetkizý jaǵynan ózderińizdiń rólderińiz óte úlken", - dedi A.Balaeva.
