Astanada rýlsiz avtobýs aıdaǵan júrgizýshi jumystan shyǵaryldy
ASTANA. QazAqparat - Astanada qoǵamdyq avtobýsty rýlsiz basqarǵan júrgizýshi men ondaǵy kondýktor jumystan shyǵaryldy, dep habarlaıdy QazAqparat tilshisi.
«Tehnıkalyq aqaý boıynsha avtobýs júrgizýshisi kómek kútýi tıis edi. Yńǵaısyz jerge turyp qalǵandyqtan, júrgizýshi kólik aǵynyna kedergi keltirmeý úshin jáne avtobýsty qaýipsiz jerge qoıý úshin rýlsiz kólikpen birneshe metr júrgen. Sol sátte kondýktor ony beınekameraǵa túsirip alǵan. Áleýmettik jelide tez taraǵan bul vıdeo kópshiliktiń narazylyǵyn týǵyzdy. Saldarynan júrgizýshi men kondýktor jumystan shyǵaryldy», - dep habarlady «Astana LRT» JShS qoǵammen baılanys departamentiniń dırektory Naýat Azanbaeva.
Astana LRT bul oqıǵany júrgizýshiniń ózine ǵana emes, jol qozǵalysyndaǵy barlyq turǵyndarǵa qaýip tóndirdi dep esepteıdi.
Eske sala ketsek, buǵan deıin áleýmettik jelide jol ortasynda avtobýsty rýlsiz aıdap kele jatqan júrgizýshiniń vıdeosy paıda bolǵan edi.
