Astanada orynsyz jerge qoqys tastaǵandar 70 mln teńge aıyppul tóledi
ASTANA. KAZINFORM – Elordada stıhııalyq polıgondarmen kúres turaqty túrde júrgizilip jatyr. Jyl basynan beri qalanyń bes aýdanynda 100 myń tonnadan asa qoqys jınalyp, polıgondarǵa shyǵaryldy, dep habarlaıdy Astana ákimdiginiń resmı saıty.
«Elordanyń ár aýdanynda kún saıyn ruqsat etilmegen polıgondardyń bolýyna monıtorıng júrgiziledi. Jyl basynan beri qaladaǵy jáne elordanyń irgeles aýmaqtary boıynsha 223 ýchaske (338-den) — 67% joıyldy, 100 myń tonnadan asa qoqys (8 500 reıs) shyǵaryldy» - delingen habarlamada.
Onyń ishinde Almaty aýdanynda 61 ýchaske (62-den), Baıqońyr aýdanynda — 44 ýchaske (46-dan), Esil aýdanynda 84-ten 39 ýchaske, Saryarqa aýdanynda 23-ten 22 ýchaske jáne Nura aýdanynda 120-dan 54 ýchaske joıyldy.
Jumystarǵa 100-ge jýyq arnaıy tehnıka jumyldyryldy.
Bul rette jergilikti polıtsııa qyzmeti ótken jyly abattandyrý erejelerin buzǵan 17 myń adamdy anyqtady. Olar QR ÁQBtK-tiń 505-babyna sáıkes, 70 mln teńge aıyppul tóledi.
Sondaı-aq ekologııa departamenti QR ÁQBtK-tiń 344-baby boıynsha ekologııalyq talaptardy buzýshylarǵa 1 mln 300 teńge somasynda aıyppul saldy.
Aıta ketý kerek, barlyq qaldyqtar arnaıy tehnıkamen birge «Soltústik jotanyń» aýmaǵyna shyǵaryldy. Shyǵarylǵan arnaıy tehnıkanyń jalpy sany ótken jyly 20 birlikti qurady.
Sondaı-aq júk kólik quraldarynyń qozǵalysyn shekteý jáne ruqsat etilmegen qoqys úıindilerin uıymdastyrýdyń aldyn alý úshin Astanada tyıym salatyn jol belgileri ornatyldy: Aıtmatov, Syǵanaq, Turan, Máńgilik el kósheleriniń (Qarlyǵash balabaqshasy aýmaǵynda), Qabanbaı batyr dańǵylynyń (Prıgorodnyı kenti jáne áýejaı aýmaǵynda) boıyndaǵy sezderge jalpy sany — 51 ýchaskede; Nurly jol vokzaly aýmaǵynda, Telman kentinde jáne A62 kóshesi aýmaǵynda 41 ýchaskede.
Bıyl Astana qalasy Tsıfrlandyrý jáne memlekettik qyzmetter basqarmasymen birlesip, ruqsat etilmegen qoqys úıindileri jınalatyn oryndarǵa táýlik boıy monıtorıng júrgizý úshin jalpy beınebaqylaý kameralarynyń sany ulǵaıtyldy.
