Astanada ruqsat etilmegen 33 qoqys orny joıyldy
ASTANA. KAZINFORM – Astanada zańsyz paıda bolǵan qoqys oryndarymen kúres júrip jatyr. Jyl basynan beri qalanyń bes aýdanynda ruqsat etilmegen 33 qoqys orny joıyldy, 45 myń tonnaǵa jýyq qaldyq shyǵaryldy. Bul týraly Astana ákimdiginiń resmı saıty jazdy.
Mysaly, Saryarqa aýdanynda monıtorıng nátıjeleri boıynsha 12 stıhııalyq qoqys orny tabyldy. Búgingi tańda olardyń 8-i pysyqtaldy, qalǵandary boıynsha jumys aıaqtalý satysynda. Merdigerlik uıymdar 16 myń tonnadan astam qoqys shyǵardy.
Baıqońyr aýdanynda kólemi 3,3 myń tonnadan asatyn ruqsat etilmegen 3polıgon joıyldy.
Almaty aýdanynda joıylǵan 20 orynnan 15 000 tonna (2 142 reıs) qoqys shyǵaryldy.
Esil aýdanynda kólemi 150 myń tonna bolatyn ruqsat etilmegen polıgondardyń 7 orny anyqtaldy. 9 myń tonna qaldyq shyǵaryldy. Jumys júrip jatyr.
Nura aýdanynan joıylǵan orynnan 588 tonna qoqys shyǵaryldy.
Astanada ruqsat etilmegen qoqys úıindilerinen qoqys jınaýǵa arnalǵan qalalyq QTQ polıgonynyń janynda ýaqytsha alań belgilendi, ol Alash, 64 tas jolynda ornalasqan.
«Kún saıyn iKomek arqyly qurylys alańdarynan qoqys shyǵarý jáne belgilenbegen oryndarǵa qoqys tastaý faktileri anyqtalady, quqyq qorǵaý organdarymen birlesip, reıdtik is-sharalar júrgiziledi. Jyl basynan beri 232 ákimshilik quqyq buzýshylyq anyqtaldy», — delingen habarlamada.
Zańsyz polıgondardy joıý jumysy jalǵasyp jatyr. Onyń ishinde jańa oshaqtardyń paıda bolýyna jol bermeý boıynsha sharalar qabyldanbaq.
Esterińizge sala keteıik, «Taza Qazaqstan. Astana — tazalyq pen tártiptiń úlgisi» qalany sanıtarlyq tazartý, nóser jáne aryq kárizderin tazartý, kóshelerdi, trotýarlardy, kvartalishilik aýmaqtardy, qoǵamdyq keńistikter men aýlalardy tazalaý jumysy júrip jatyr.
Sondaı-aq, jasyl jelekterdi kútip-ustaý jáne otyrǵyzý, saýda nysandaryna irgeles aýmaqtardy jınaý, kógaldar men gúlzarlar ornatý, ruqsat etilmegen polıgondardy joıý jáne t. b. jumystar júrgizilip jatyr.
