Astanada ruqsat etilmegen jerlerge qar tókken 22 adamǵa aıyppul salyndy
ASTANA. QazAqparat - Jyl basynan beri elordalyq tabıǵat qorǵaý polıtsııasynyń qyzmetkerleri kóshedegi jáne joldaǵy qardy ruqsat etilmegen jerlerge zańsyz tókken 22 avtokólik júrgizýshisin ákimshilik jaýapkershilikke tartty, dep jazady elorda ákimdiginiń resmı saıty.
Astana q. ІІD Jergilikti polıtsııa qyzmetiniń habarlaýynsha, júrgizýshilerge 509 040 teńge kóleminde aıyppul salyndy.
«Qysqy kezeńde qala aýmaǵyn jınaý erekshelikteri» abattandyrý Erejelerine sáıkes (Astana q. máslıhatynyń sheshimimen bekitilgen, 5 bólim, 60 t.), kóshedegi jáne joldaǵy qardy arnaıy daıyndalǵan alańdarǵa shyǵarý qajet. Qardy (qoqyssyz) kelesi mekenjaılar boıynsha shyǵarýǵa ruqsat etilgen: «Almaty» aýdany - Jeleznodorojnyı t.a., áskerı bólimsheniń syrtynda. «Saryarqa» aýdany - N. Tilendıev dańǵ., «Taım» JQS aýdany. «Esil» aýdany - Rojdestvenka tas joly, «Rýbej» beketiniń syrtynda, oń jaqta, sondaı-aq, sý tazartqysh qurylystarynyń aýdanynda 27-shi kóshede balqytý stantsııasy bar.
