Astanada robototehnıkadan Qazaqstannyń ulttyq quramasy anyqtalady
ASTANA. KAZINFORM – 24-26 tamyz aralyǵynda Astanadaǵy Qazaq ulttyq sport ýnıversıtetinde FIRST Global Challenge Central Asia 2026 jarysy ótip jatyr. Onyń qorytyndysy boıynsha robototehnıkadan Qazaqstannyń ulttyq quramasy anyqtalady, dep habarlaıdy Jasandy ıntellekt jáne tsıfrlyq damý mınıstrligi.
Jeńimpaz komanda Qazaqstan atynan 7-10 qazan aralyǵynda Koreıa Respýblıkasynyń Inchhon qalasynda ótetin FIRST Global Challenge 2026 álem chempıonatyna qatysady.
Jarysty QR Jasandy ıntellekt jáne tsıfrlyq damý mınıstrligi, QR Oqý-aǵartý mınıstrligi, «Daryn» respýblıkalyq ǵylymı-bilim berý ortalyǵy, Astana Hub halyqaralyq ınnovatsııalyq klasteri jáne Astana Motors quramyndaǵy OMODA&JAECOO brendiniń qoldaýymen USTEM Foundation qoǵamdyq qory uıymdastyryp otyr.
Saıysqa Qazaqstannan shamamen 40 komanda jáne Ózbekstannyń jetekshi komandalary qatysady. Úsh kún boıy oqýshylar ınjenerlik jobalary men tehnıkalyq portfolıolaryn tanystyryp, baǵdarlamalaý, ınjenerlik oılaý jáne komandalyq jumys boıynsha sheberlikterin kórsetedi.
Sonymen qatar qatysýshylar FIRST Global Challenge resmı oıyn alańynda arnaıy tapsyrmalardy oryndaıdy.
– 2026 jylǵy jarystyń Igniting Innovation taqyryby orman órtteriniń aldyn alý, olardyń zardaptaryn azaıtý jáne zardap shekken aýmaqtardy qalpyna keltirý úshin ınjenerlik jáne tehnologııalyq sheshimderdi qoldanýǵa arnalǵan. Qatysýshylar modeldengen ortada tapsyrmalardy oryndaý úshin robottardy qurastyryp, baǵdarlamalaýy qajet, – delingen mınıstrlik habarlamasynda.
Ulttyq irikteýde jeńiske jetken komanda álemniń 190-nan astam elinen oqýshylar bas qosatyn álem chempıonatynda Qazaqstan namysyn qorǵaıdy. Onda qatysýshylar robototehnıka boıynsha synǵa túsip qana qoımaı, jahandyq tehnologııalyq máselelerdi sheshý úshin halyqaralyq komandalar quramynda birlesip jumys isteıdi.
Qazaqstan sońǵy jyldary FIRST Global Challenge chempıonatynda joǵary nátıje kórsetip keledi. Ulttyq qurama 2022 jyldan 2025 jylǵa deıin tórt jyl qatarynan álem chempıonatynyń jeńimpazy atanǵan. Osylaısha Qazaqstan oqýshylar arasyndaǵy halyqaralyq robototehnıka kóshbasshylarynyń birine aınaldy.
2026 jyldan bastap iri halyqaralyq olımpıadalar men ǵylymı jobalar konkýrstarynyń jeńimpazdary men júldegerleri úshin bilim alý múmkindikteri de keńeıtildi.
FIRST Global Challenge halyqaralyq ǵylymı jobalar konkýrstarynyń tizimine engizildi. Sonyń nátıjesinde onyń jeńimpazdary men júldegerleri «bakalavrıat» sanaty boıynsha «Bolashaq» halyqaralyq stıpendııasyna úmitker bola alady.
Bul qazaqstandyq daryndy oqýshylardyń akademııalyq jáne kásibı damýyna qosymsha múmkindik beredi.
Aıta keteıik, qazaqstandyq oqýshylar robototehnıkadan halyqaralyq chempıonatta 23 júlde ıelendi.
