Astanada robototehnıkadan chempıonat ótýde
ASTANA. QazAqparat - Táýelsizdik saraıynda elordalyq oqýshylar arasynda robototehnıkadan chempıonat ótip jatyr. Jarysqa qatysýshylar 3 sanat boıynsha ózara baq synasady: «Syzyq boıyndaǵy jarys», «Tapsyrmany oryndaý» jáne «Robokúres».
Shara QR PrezıdentinińQazaqstan halqyna Joldaýyn júzege asyrý, jastar men balalardyń ınnovatsııalarǵa jáne joǵary tehnologııalarǵa qyzyǵýshylyǵyn arttyrý maqsatynda qolǵa alynǵan. Ony qalalyq bilim basqarmasy «Astana daryny» óńirlik ǵylymı-praktıkalyq ortalyǵy men «Bilim ınnovatsııa» halyqaralyq qoǵamdyq qorymen birlese uıymdastyryp otyr, dep habarlaıdy elorda ákimdigi .
Chempıonatta elordanyń 31 mektebi men lıtseılerinen barlyǵy 82 komanda tirkeldi. Qalalyq kezeńge 23 bilim berý mekemesinen 46 komanda joldama aldy. Jarysqa 10-19 jas aralyǵyndaǵy balalar qatysady. Árbir komanda quramyna eki sportshy jáne bir robot kiredi.
Astana qalasynyń bilim basqarmasy basshysynyń orynbasary Ánýar Janǵozınniń aıtýynsha, chempıonat alǵash ret ótkizilip otyr.
«Chempıonat jyl saıyn ótkizilmek. Osy jarys arqyly biz balalardyń qyzyǵýshylyǵyn anyqtamaq boldyq. Qatysýǵa ótinimder kóp túskendikten bul jarys olarǵa qyzyq bolady dep sheshtik. Aldaǵy ýaqytta jarys jeńimpazdary respýblıkalyq deńgeıde top jarǵan bolyp eseptelip, halyqaralyq arenada Qazaqstan namysyn qorǵaıtyn bolady», - dedi ol.
Robotehnıkadan chempıonat - tartysty jarys. Onyń barysynda jas daryndar túrli tapsyrmalardy minsiz oryndaıtyn robottardy qurastyrady.
Chempıonatqa qatysýshy «Nur Orda» lıtseıiniń shákirti Marǵulan Janaı óz eńbeginiń úzdik úshtikke enetinine senimdi.
«Chempıonatty uıymdastyrýshylarǵa rızamyn. Bul jarys barlyq balalarǵa paıdaly. Birinshiden, ol oılaýdy, matematıka, fızıka jáne logıkany damytady. Ekinshiden, bolashaqta kúrdeli baǵdarlamalardy zertteýge jáne aqyl-oı qabiletin damytýǵa septigin tıgizedi.
Chempıonattyń jeńimpazdary men júldegerleri marapattaý saltanaty 19 aqpanda «Nur Orda» qazaq-túrik lıtseıinde ótedi.
Jarysqa qatysýshylar sertıfıkatpen marapattalady.
