Astanada halyqaralyq robototehnıka chempıonatyna 134 komanda qatysyp jatyr
ASTANA. KAZINFOM — 2025 jylǵy 13 mamyrda Astana qalasynda «Robotek Grand Tournament» halyqaralyq robototehnıka chempıonaty bastaldy.
Bul doda Qazaqstan men álemdegi eń iri jasóspirimderge arnalǵan robototehnıka jarystarynyń biri retinde tanylyp otyr.
Tórt jyl ishinde «Robotek Grand Tournament» ulttyq ІT brendke aınalyp, onyń barlyq reglamenti otandyq zııatkerlik menshikke negizdelgen.
Astanada Nazarbaev Ýnıversıtetinde ótkizilgen jarysta, elimizdiń 17 óńirinen irikteý kezeńderinde jeńimpaz bolǵandar bas qosty. Aıta keterligi, bıyl jarysqa alǵash ret AQSh-tan ókilder qatysty, sonymen qatar Bolgarııa, Ázerbaıjan, Moldova, Ózbekstan, Qyrǵyzstan, Tájikstan sııaqty elderden 25-ten astam sheteldik delegatsııa qatysady.
Jalpy alǵanda, jarysqa 134 komanda quramynda 9 ben 17 jas aralyǵyndaǵy 350-den astam mektep oqýshysy (onyń ishinde 40-qa jýyq sheteldik qatysýshy) qatysyp, 270-ten astam robot jeti túrli sanat boıynsha baq synap jatyr.
Chempıonat aıasynda ár sanat boıynsha jeńimpazdar men júldegerlerge kýboktar men qurmet gramotalary tabystalady. Sonymen qatar «Úzdik aýyldyq komanda», «Úzdik sheteldik komanda», «Úzdik ınjenerlik sheshim» sekildi arnaıy nomınatsııalar boıynsha da marapattar qarastyrylǵan.
Jarys qorytyndysy boıynsha eki jeńimpazǵa Qazaqstan-Brıtan tehnıkalyq ýnıversıtetiniń Aqparattyq tehnologııalar jáne ınjenerııa mektebine bilim granty, sondaı-aq Almaty energetıka baılanys ýnıversıtetiniń granty usynylady.
Chempıonatty Astana qalasynyń ákimdigi men «Daryn» respýblıkalyq ǵylymı-praktıkalyq ortalyǵymen birlesip uıymdastyryp otyrǵan — elimizdegi STEM-bilim men robototehnıka salasyndaǵy eń tabysty kompanııalardyń biri sanalatyn «Robotek» kompanııasy.
Aıta keteıik, 2023 jylǵy qarashada Panamada ótken World Robot Olympiad halyqaralyq jarysynda «Robotek» kompanııasynyń eki birdeı komandasy jeńis tuǵyrynan kórinip, el abyroıyn asqaqtatty.
Buǵan deıin qazaqstandyq oqýshylar álemdegi eń iri robototehnıka chempıonatynda el namysyn qorǵaıtyny habarlandy.