Astanada robot-kýrerler tapsyrys jetkize bastady
ASTANA. KAZINFORM – Astanada tapsyrysty avtonomdy túrde jetkizetin robot-kýrerlerdiń jańa servısi testilik rejımde iske qosyldy. Bul týraly elorda ákimdiginiń resmı saıty habarlady.
Jobanyń alǵashqy kezeńinde Esil jáne Nura aýdandarynyń turǵyndary jaıaý júrginshiler ınfraqurylymy arqyly ózdiginen qozǵalatyn robot-kýrerlerdiń kómegimen tapsyrystaryn tegin ala alady. Eger kórsetilgen mekenjaı pılottyq joba aýmaǵyna kirse, paıdalanýshy tapsyrys rásimdeý kezinde kádimgi kýrerdi nemese robot-kýrerdi tańdaı alady.
Robot tapsyrysty turǵyn úıge deıin jaıaý júrginshiler jolymen jetkizip, kireberis aldyndaǵy trotýarda nemese eń jaqyn qoljetimdi jerde toqtaıdy. Paıdalanýshy onyń qozǵalysyn qosymsha arqyly baqylap, kelgennen keıin smartfonnyń kómegimen júk bóligin ashyp, tapsyrysyn ala alady.
Robottar navıgatsııalyq júıeler, kompıýterlik kórý jáne nysandardy taný tehnologııalary arqyly baǵytty ózdiginen quryp, aınalasyndaǵy jaǵdaıdy taldaıdy. Olar kedergilerdi anyqtap, aınalyp ótedi, jaıaý júrginshilerge jol beredi, qajet bolǵan jaǵdaıda jyldamdyǵyn tómendetip, qaýipsiz toqtaı alady. Robottardyń ortasha qozǵalys jyldamdyǵy saǵatyna shamamen 6 shaqyrymdy quraıdy.
Baǵdarlamalyq qamtamasyz etý men datchıkter júıesiniń arqasynda robottar ártúrli aýa raıy jaǵdaıynda da jumys isteı alady.
Aıta keteıik, jobanyń alǵashqy synaq kezeńi 2026 jylǵy 15 shildede bastaldy. Osy ýaqyt ishinde mamandar robottardyń qala kóshelerindegi qozǵalysyn, jaıaý júrginshilermen jáne ınfraqurylym nysandarymen ózara árekettesýin, sondaı-aq olardy qaýipsiz paıdalaný tetikterin tekserdi.
– Astanada turǵyndarǵa arnalǵan qalalyq servısterdi qoljetimdi ári yńǵaıly etý úshin zamanaýı tehnologııalardy kezeń-kezeńimen engizip kelemiz. Bul joba aıasynda avtonomdy jetkizý qyzmetiniń qalalyq ınfraqurylym jaǵdaıyndaǵy jumysyn baǵalaımyz. Negizgi nazar qaýipsizdikke, servıstiń senimdiligine jáne paıdalanýshylarmen ózara baılanysqa aýdarylady. Alynǵan nátıjeler elordada avtonomdy jetkizý qyzmetin odan ári damytýǵa negiz bolady, – dedi Astana Innovations basqarma tóraǵasy Ǵızat Ámirǵalı.
Pılottyq jobanyń iske qosylýy elorda turǵyndary men qonaqtaryna tapsyrys jetkizýdiń jańa tehnologııalyq formatyn kúndelikti ómirde paıdalanyp kórýge múmkindik beredi. Joba aýqymy keńeıgen saıyn qyzmet kórsetý aýmaǵy da ulǵaıady.
– Búginde eldi tsıfrlyq transformatsııalaý boıynsha aýqymdy mindetter júktelip otyr. Memleket basshysynyń bastamasymen 2026 jyl Jasandy ıntellekt jáne tsıfrlandyrý jyly bolyp jarııalandy. Sonymen qatar bıyl Digital Qazaqstan strategııasy qabyldanyp, onda ushqyshsyz tehnologııalardy damytý tsıfrlyq transformatsııanyń negizgi baǵyttarynyń biri retinde aıqyndaldy. Robot-kýrerlerdiń pılottyq iske qosylýy – ınnovatsııalardyń ázirleý kezeńinen kúndelikti qoldanysqa ótkeniniń naqty mysaly. Bizdiń mindetimiz – osyndaı sheshimderdi damytýǵa jáne olardy qalalyq ınfraqurylymǵa qaýipsiz engizýge jaǵdaı jasaý, – dedi Jasandy ıntellekt jáne tsıfrlyq damý vıtse-mınıstri Ǵızzat Baıtursynov.
Aıta keteıik, Qaraǵandyda qoǵamdyq qaýipsizdikti robot-ıt kúzetip júr.
