Astanada «Rixos» mańynda bolǵan atystan jaralanǵan eki adam aýrýhanaǵa tústi (VIDEO)
ASTANA. QazAqparat - Astanada 17 shilde, tańǵy saǵat 08:00 shamasynda «Rixos» qonaqúıi mańynda oryn alǵan atys negizinde, buzaqylyq jáne atys qarýyn zańsyz satyp alý jáne saqtaý baptary boıynsha qylmystyq is qozǵaldy.
Bul týraly búgin «QazAqparat» agenttigine Astana qalasy ІІD baspasóz qyzmeti habarlady.
«Astanada 17 shilde, tańǵy saǵat 08:00 shamasynda «Rixos» qonaqúıi mańynda oryn alǵan atys negizinde, QR QK-niń 293 baby 3-bóligi - buzaqylyq jáne QR QK-niń 287 baby 2-bóligi - atys qarýyn zańsyz satyp alý jáne saqtaý baptary boıynsha eki qylmystyq is qozǵaldy», - delingen habarlamada.
Sot aldyndaǵy anyqtaý sharalarynda belgili bolǵanyndaı, dámhana klıentteriniń arasyndaǵy atys ekeýara kıkiljińnen týyndaǵan. Nátıjesinde zardap shekken eki adam Astana qalasynyń medıtsınalyq mekemelerine jetkizildi.
Tergeý barysynda ýaqytsha ustaý ızolıatoryna oqıǵanyń eki qatysýyshysy - 25 jáne 29 jastaǵy eki jigit qamaldy.
Qylmystyq is boıynsha tıisti saraptamalar taǵaıyndaldy. Qazir sot aldyndaǵy tergeý jumystary jalǵasýda.
