Astanada rejısser Ersaıyn Tápenov marapattaldy

ASTANA. QazAqparat - QR Mádenıet jáne sport mınıstrliginde rejısser, Qazaqstannyń eńbek sińirgen qaıratkeri Ersaıyn Qanderjanuly Tápenovty qabyldaǵan vedomstvonyń jaýapty hatshysy Q. Ýálıev 70-ke tolǵan óner ıesine mınıstrdiń atynan Qurmet gramotasyn, «Qazaq handyǵynyń 550 jyldyǵy» medali men arnaıy sertıfıkatyn tabys etti. Bul týraly vedomstvonyń baspasóz qyzmetinen habarlandy.

Rejısserdiń eleýli eńbegin atap ótken jaýapty hatshy mınıstrlik janynan qurylǵan kórkemdik keńeste de E.Tápenov jemisti eńbek atqarady dep senim bildirdi. Basqosýǵa QR Mádenıet jáne sport vıtse-mınıstri Ǵ. Ahmedıarov pen mınıstr keńesshisi Ǵ.Meldeshov qatysty. E.Tápenov óziniń qyzmet jolynda Muhtar Áýezovtiń «Aıman-Sholpan», «Dos - Bedel dos», Ǵabıt Músirepovtiń «Aqan seri-Aqtoqty», «Qozy Kórpesh-Baıan sulý» («Mahabbat týraly poema» degen atpen), E.Brýsılovskıı men Ǵ.Músirepovtiń «Qyz Jibek», Beıimbet Maılınniń «Shuǵa», Qaltaı Muhamedjanovtyń «Bóltirik bórik astynda», Tahaýı Ahtanovtyń «Mahabbat muńy», «Kúshik kúıeý», Ákim Tarazıdiń «Jaqsy kisi», Dýlat Isabekovtyń «Ápke», Oljas Súleımenov pen Baqqoja Muqaıdyń «Zamanaqyr», Muhtar Shahanovtyń «Otyrar dastany», Maman Baıserkeulynyń «Kene han» shyǵarmalaryn sahnaǵa shyǵardy. Sondaı-aq N.Gogoldiń «Yılený», A.Chehovtyń «Shaǵala», Evrıpıdtiń «Medeıa», Ý.Shekspırdiń «Asaýǵa tusaý», «Korol Lır» jáne basqa da avtorlardyń týyndylaryn kórermenge usyndy.