Astanada rejısser Bolat Uzaqovtyń 50 jasqa tolý mereıtoıyna oraı shyǵarmashylyq aptalyǵy ótedi
ASTANA. 18 qańtar. QazAqparat - Qańtar aıynyń 22 men 25 aralyǵynda alǵash ret Q.Qýanyshbaev atyndaǵy Memlekettik akademııalyq qazaq mýzykalyq drama teatrynyń ujymynda, rejısser Bolat Uzaqovtyń 50 jasqa tolǵan mereıtoıy qurmetine «Rejısser álemi» atty shyǵarmashylyq aptalyǵy ótedi. Bul týraly teatrdyńs baspasóz qyzmetinekn habarlady.
Aptalyq barysynda rejısser sahnalaǵan qoıylymdar: 22 qańtarda - Ý.Shekspırdiń "Gamlet" tragedııasy; 23 qańtarda - S.Turǵynbekulynyń "Muqaǵalı" poetıkalyq dramasy; 24 qańtarda - D.Ramazannyń "Kenesary - Kúnimjan" dramasy kórsetiledi.
25 qańtar kúni saǵat 18.30-da rejısser, QR eńbek sińirgen qaıratkeri Bolat Uzaqovtyń «Rejısser álemi» atty shyǵarmashylyq keshi ótedi.
Bolat Qasymjanuly Uzaqov- rejısser, akter jáne dramatýrg. 1997 jyly Astana qalasyndaǵy Q.Qýanyshbaev atyndaǵy Memlekettik akademııalyq qazaq mýzykalyq drama teatryna rejısser qyzmetine arnaıy shaqyrýmen kelgen.
1980-1984 jyldary Almaty Memlekettik teatr-kórkemsýret ınstıtýtynyń teatr fakýltetin halyq artısi A.Toqpanovtyń jáne halyq artısteri Y.Noǵaıbaev pen F.Sháripovanyń sheberhanasyn «Kıno jáne teatr akteri» mamandyǵy boıynsha bitirip shyqty.
1994-1997 jyldary T. Júrgenov atyndaǵy óner akademııasynyń «Drama rejısseri» mamandyǵyn halyq artısi M.Baıserkenov pen Qazaqstannyń eńbek sińirgen qaıratkeri S.Asylhanovtan bitirdi.
1984-1997 jyldary Taldyqorǵan oblystyq B.Rımova atyndaǵy qazaq drama teatry sahnasynda 40-qa jýyq keıipker somdap, teatrdyń beldi akteri boldy. Oınaǵan obrazdary arqyly óziniń sahnada oılaı biletin, jan-jaqty sheber akter ekenin tanytty. Sahnager retinde eńbegi baǵalanyp, kóptegen festıvalderden júldeli oryndar men maqtaý gramotalaryna jáne baǵaly syılyqtarǵa ıe boldy.
