Astanada reıd barysynda 100-ge jýyq dinı kitap tárkilendi
ASTANA. 23 qarasha. QazAqparat - Astana qalasynda «Dinı qyzmet jáne dinı birlestikter týraly» QR Zańyna sáıkes tek 8 orynda ǵana dinı ádebı kitaptardyń satylymyna ruqsat berilgen.
Atalǵan 8 orynǵa qosa dinı ádebıetterdi óz aýlasynda taratýǵa resmı tirkeýden ótken 47 dinı birlestik quqyly. Alaıda, bas paıdasyn kózdegen alyp-satarlardyń joly áli de kesiler emes. Astana qalasynyń ózinde 41 saýda ornynda dinı kitaptar zańsyz satylýda degen aqparat bar.
«Departamentke, agenttikke kelip túsken materıaldar boıynsha taralyp jatqan aqparattardyń syn kótermeıtindigin baıqaımyz. Óıtkeni, ol aqparattar úıde basylyp shyǵýy múmkin, avtorlary belgisiz, qaı baǵytta ekenin eshkim bilmeıdi. Osynyń negizinde kóp jaǵdaıda halyq aldanyp qalady», - deıdi Astana qalasy Din isteri departamentiniń dırektory Jorabek Dáýrenov.
Al kitap dúkeniniń ıesi Rafael Qanbabaevtyń pikiri mynadaı: «Bilýimshe, balalar ádebıetinen góri, dinı kitaptar suranysqa kóbirek ıe. Sondyqtan, olardy sóreden alyp tastaǵannan halyqqa paıda bolady dep oılamaımyn. Onyń ústine, senimdi baspalarmen jumys isteımin. Kitaptardyń ishinde artyq nárse bolýy múmkin emes».
Búginde Astana qalasynyń ákimdigi, Qalalyq prokýratýra, Din isteri departamenti zańsyz dinı kitaptardy taratýshylarmen kúresý úshin arnaıy reıd júrgizýde. Tekserý nátıjesinde 100-ge jýyq dinı kitap tárkilenip, dúken ıelerine qatań eskertýler jasaldy.
