Astanada Respýblıkalyq jastar medıa-forýmy bastaldy

«Memlekettik jastar saıasatyn iske asyrý barysyn buqaralyq aqparat quraldarynda, sondaı-aq jastardyń úlken suranysyna ıe áleýmettik jeliler men ǵalamtorda aqparattyq súıemeldeý baǵytynda birqatar jumystar atqarylyp keledi. Búgingi jastar medıa-forýmy osyǵan mysal bola alady. BAQ-tyń jas ókilderi forým aıasynda sizderdiń aldaǵy kásibı qyzmetterińizge qajetti sheberlik-synyptary, jýrnalıstıka mamandarymen kezdesýler, elimizdiń jetekshi telearnalary jumysymen tanysý uıymdastyrylady. Sizder elimizdegi jáne álemdegi mańyzdy oqıǵalarǵa sholý jasaı otyryp, jastar saıasatyn aqparattyq qoldaýǵa basymdyq berýlerińiz qajet. Osylaısha, óskeleń urpaqtyń óz quqyqtary men mindetterin bilýine, qazaqstandyq otansúıgishtik rýhynda tárbıelenýine eleýli úles qosasyzdar dep senemin»,-dedi QR Bilim jáne ǵylym mınıstrligi janyndaǵy Jastar isi boıynsha komıtetiniń tóraǵasy Ǵabıdolla Ospanqulov.

2020 jylǵa deıingi jastar saıasatyn damytý tujyrymdamasy qabyldanǵanyn, Úkimet qujatty iske asyrýdyń is-sharalaryn bekitkenin eske salyp ótken ol, «búginde bul baǵyttaǵy jumystar júzege asyrylýda. Sonymen qatar jańa jobasy ázirlenip, búginde Úkimettiń qaraýyna engizildi»,-dedi.

Sóz sońynda komıtet tóraǵasy jastar saıasaty aıasynda atqarylyp jatqan is-sharalar men jastardyń múmkindikterin BAQ arqyly barynsha taratyp, jastardyń qalyptasýyna járdemdesýdi surady.

Atap aıtqanda, forýmnyń plenarlyq otyrysynan keıin «Seniń kózqarasyń» shyǵarmashylyq baıqaýynyń jeńimpazdaryn marapattaý jáne «Rahmet» syılyǵyn tabystaý rásimi ótedi. Munymen qosa jastarǵa arnalǵan blogerlik, PR jáne áleýmettik jeliler, memlekettik jastar saıasaty salasynda aqparat almasý baǵyttarynda sheberlik-synyptary uıymdastyrylady. Sondaı-aq, forým delegattary «Jastar jáne jergilikti ózin-ózi basqarýdy damytý» taqyrybynda ótkiziletin pikir almasý alańynda óz oılaryn ortaǵa salatyn bolady.