Astanada respýblıkalyq patrıottyq ánder baıqaýy ótedi
ASTANA. 22 qarasha. QazAqparat - 25 qarasha kúni Astanada «Jas qyran» áskerı patrıottyq birlestikteriniń respýblıkalyq damytý ortalyǵy QR Bilim jáne ǵylym mınıstrligi men Jas áskerıler birlestikteriniń respýblıkalyq shtabynyń qoldaýymen «Otan ottan da ystyq» atty jastardyń áskerı-patrıottyq forýmy aıasynda «Qazirgi zaman qaharmandary» atty Respýblıkalyq patrıottyq ánder baıqaýyn ótkizedi.
Bul týraly «Jas qyran» áskerı-patrıottyq birlestikteri respýblıkalyq damytý ortalyǵynyń baspasóz qyzmeti habarlady.
Baıqaýdyń maqsaty - balalar men jastardy rýhanı-adamgershilik jáne azamattyq-patrıottyq turǵydan tárbıeleý. Shaqyrylǵan qonaqtar qatarynda «Nur Otan» partııasynyń ókilderi, QR Parlament Májilisiniń depýtattary, mınıstrlikter basshylary, UOS men jergilikti soǵystardyń ardagerleri, kórnekti qoǵam qaıratkerleri, saıası qaıratkerler, sport qaıratkerleri, mádenıet jáne óner qaıratkerleri, t.b. bar.
Baıqaýǵa kásibı jáne kásibı emes shyǵarmashylyq ujymdar men oryndaýshylar qatysady. Qatysýshylardyń jas shamasy - 29 jasqa deıin. Án baıqaýy barysynda azamattyq pen otanshyldyq ıdeıalaryn nasıhattaǵan eń úzdik ujymdar, avtorlar, oryndaýshylar anyqtalady. Baıqaý nomınatsııalary- «Solo», «Dýet pen trıo», «Vokaldyq ansamblder», «Hor». Bir alańda ártúrli býyn ókilderi jınalady. Shara baǵdarlamasynda tarıhshy-etnografpen kezdesý bolady, sonymen qatar, áskerı-patrıottyq birlestikter úshin ınternet jumysyn damytý boıynsha sheberlik-synyptary ótkiziledi.
«Qazirgi zaman qaharmandary» baıqaýynyń jeńimpazdaryna dıplomdar men baǵaly syılyqtar tabys etiledi. Baıqaý qorytyndysy boıynsha ánder CD dıskige jazylyp, maqsatty aýdıtorııasyna taratylatyn bolady.
