Astanada respýblıkalyq patrıottar forýmy bastaldy

ASTANA. QazAqparat - Astanada «Qazaqstan» ortalyq kontsert zalynda «Máńgilik el - bolashaǵy birtutas el» atty respýblıkalyq patrıottar forýmy óz jumysyn bastady.

Forýmǵa qatysýǵa barlyq óńirlerden shamamen 2 myńnan astam delegat keldi. Olar óz isiniń úzdik mamandary - dárigerler, áskerıler, ónerkásip jumysshylary, ǵalymdar, jas kóshbasshylar, aýyl sharýashylyǵy qyzmetkerleri, qoǵam qaıratkerleri, sportshylar, talantty akterler, mádenıet maıtalmandary.

Patrıottar forýmy 2007 jyldan beri jyldyń aıtýly sharalary aıasynda elimizdiń túrli qalalarynda ótkiziledi.

Bıylǵy forým Memleket basshysy Nursultan Nazarbaevtyń Máńgilik el jalpyulttyq ıdeıasyna arnalady.

Forým aıasynda «Jyl patrıoty» atty jyl saıynǵy baıqaýdyń saltanatty qorytyndysy shyǵarylady. Baıqaýda erlik kórsetken, sondaı-aq Otanǵa degen súıispenshiligin kúndelikti eńbegimen, naqty isterimen dáleldeı bilgen qazaqstandyqtar jeti atalym boıynsha marapattalatyn bolady.