Astanada respýblıkalyq balalar sammıti ótedi
ASTANA. Qazannyń 31-i. QazAqparat - Qarashanyń 2-sinde Astanada Qazaqstan Respýblıkasy Bilim jáne ǵylym mınıstrliginiń bastamasymen BUU Bala quqyqtary týraly konventsııasynyń 20 jyldyǵyna arnalǵan «XXI ǵasyrdyń balalary: bizdiń quqyǵymyz jáne múmkindigimiz» atty respýblıkalyq balalar sammıti ótkiziledi.
«XXI ǵasyrdyń balalary: bizdiń quqyǵymyz jáne múmkindigimiz» atty sammıttiń basty mindetteri - Qazaqstan balalary men jasóspirimderiniń Bala quqyqtary týraly konventsııasynyń erejeleri jáne baptary jóninde bilimderin arttyrý, olarǵa Qazaqstannyń táýelsizdik alǵannan bergi jetistikteri jóninde málimet berý, qazirgi qazaqstandyq qoǵamdaǵy balalar men jasóspirimderdiń eń ózekti problemalaryn anyqtaý, iskerlik yntymaqtastyq ıkemderin damytýǵa járdem berý, mádenı baılanysqa, dıplomattyqqa jáne toleranttyqqa úıretý.
Sammıtke respýblıkanyń balalar jáne jastar uıymdarynyń kóshbasshylary qatysady. Respýblıkanyń barlyq aımaqtarynan 150 bala shaqyryldy. Sammıttiń qonaqtary - Qazaqstan Respýblıkasy Parlamentiniń depýtattary, dıplomattyq korpýsynyń, pedagog jáne ata-analar qoǵamynyń ókilderi.
Sammıt balalar men jastardyń áleýmettik bastamalaryn, olardyń arasyndaǵy demokratııalyq baılanys ıkemderin damytýdy, belsendi azamattyq jáne ómirlik ustanymdardy, qazaqstandyq patrıotızmdi damytýdy kózdeıdi.
