Astanada respýblıkalyq ákeler forýmy ótýde
ASTANA. QazAqparat - Elordanyń Oqýshylar saraıynda Astana ákimdiginiń jáne QR Prezıdenti janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń qoldaýymen І Respýblıkalyq ákeler forýmy ótýde, dep habarlaıdy elorda ákimdiginiń baspasóz qyzmeti.
Sharanyń maqsaty - bala tárbıesindegi ákelerdiń rólin kúsheıtý, otbasy ınstıtýtyn nyǵaıtý jáne tıisti otbasylyq tárbıe máselelerine qoǵamnyń nazaryn aýdarý.
Forým jumysyna Parlament depýtattary, qoǵam qaıratkerleri, halyqaralyq jáne úkimettik emes uıymdar, jáne elimizdiń barlyq aımaqtarynan ata-analar qoǵamynyń ókilderi qatysýda.
«Forým respýblıkalyq deńgeıde alǵash ret ótip otyr. Alaıda sharany ótkizýdiń basty ıdeıasy osydan úsh jyl buryn Astana qalasynyń №59 mektebiniń bazasynda paıda bolǵan. Osy ýaqyt ishinde ákelerdiń eki qalalyq sleti ótkizildi. Búgingi kúni sharanyń aýqymy ulǵaıyp otyr. Bul forým bala tárbıesindegi ákelerdiń bedelin arttyrýǵa yqpal etip, otbasylyq qundylyqtardyń damýyna jáne nyǵaıýyna serpin beretinine senimdimin», - dedi Astana q. Bilim basqarmasynyń basshysy Qasymhan Senǵazyev.
Forým sheńberinde ár aımaqtan kelgen úlgili delegat-ákelerge Ulttyq komıssııa atynan dıplomdar tabys etildi. Kúnniń ekinshi jartysynda qatysýshylar dóńgelek ústel basynda kezdesip, áke ınstıtýtyn damytýdyń ózekti máselelerin talqylaıdy.
