Astanada respýblıkalyq olımpıada jeńimpazdary marapattaldy
ASTANA. KAZINFORM — Astanada Qalıbek Qýanyshbaev atyndaǵy memlekettik akademııalyq qazaq mýzykalyq-drama teatrynda jalpy bilim beretin pánder boıynsha 7-8 synyp oqýshylaryna arnalǵan respýblıkalyq olımpıadanyń jeńimpazdary men júldegerlerin marapattaý rásimi ótti. Bul týraly Oqý-aǵartý mınıstrligi málim etti.
Olımpıadanyń qorytyndy kezeńine elimizdiń barlyq óńirlerinen 547 oqýshy qatysyp, nátıjesinde 240 oqýshy júldeli oryndarǵa ıe boldy. Saltanatty jabylý rásimine QR Oqý-aǵartý vıtse-mınıstri Shynar Aqparova, «Daryn» respýblıkalyq ǵylymı-praktıkalyq ortalyǵynyń dırektory Tımýr Davlet, joǵary oqý oryndarynyń ǵalymdary, sondaı-aq óńirlik «Daryn» ortalyqtarynyń ókilderi qatysty.
Olımpıada jaratylystaný-matematıkalyq jáne qoǵamdyq-gýmanıtarlyq baǵyttar boıynsha ótkizildi. Baıqaýdyń negizgi maqsaty – oqýshylardyń pándik olımpıadalarǵa qyzyǵýshylyǵyn arttyrý, ǵylymı bilimdi nasıhattaý, daryndy balalardy anyqtaý jáne olardyń zııatkerlik áleýetin damytý.
Sonymen qatar, halyqaralyq olımpıadalarǵa qatysatyn oqýshylardy irikteý men daıarlaý, elimizde bilim berý bedelin arttyrý kózdelgen. Tórt kúnge sozylǵan bilim dodasynyń qorytyndysy boıynsha jeńimpazdar men júldegerler I, II jáne III dárejeli dıplomdarmen, sondaı-aq altyn, kúmis jáne qola medaldarmen marapattaldy.
Nátıjesinde 45 oqýshy I oryn, 76 oqýshy II oryn, 119 oqýshy III oryn ıegeri atandy. Komandalyq esep boıynsha eki baǵytta da úzdik komandalar anyqtaldy. Qoǵamdyq-gýmanıtarlyq baǵytta Gran-prı «NIS» DBBU komandasyna buıyrdy. I oryn – Almaty qalasy komandasyna, II oryn – Túrkistan jáne Jetisý oblystary komandalaryna, III oryn – Shymkent qalasy, Pavlodar, Mańǵystaý jáne Aqmola oblystary komandalaryna berildi. Jaratylystaný-matematıkalyq baǵyt boıynsha Gran-prı Atyraý oblysy komandasyna tabystaldy. I oryn «NIS» DBBU jáne Almaty qalasyndaǵy KeAQ «RFMM» komandalaryna berildi. II oryn – Pavlodar jáne Mańǵystaý oblystary komandalaryna, III oryn – Astana qalasy jáne Aqtóbe oblysy komandalaryna buıyrdy. Olımpıada qorytyndysy elimizdegi daryndy oqýshylardy qoldaý júıesiniń tıimdiligin jáne óńirler arasyndaǵy bilim sapasynyń joǵary deńgeıin kórsetti.
Aıta keteıik, qazaqstandyq oqýshylar halyqaralyq bıologııa olımpıadasynda alty medal jeńip aldy.
