Astanada Respýblıka kúnine arnalǵan saltanatty kontsert ótti
ASTANA. KAZINFORM - Respýblıka kúnine oraı E. Rahmadıev atyndaǵy Memlekettik akademııalyq fılarmonııada merekelik kontsert ótti, dep habarlaıdy elorda ákimdiginiń resmı saıty.
Kórermenge quttyqtaý sózin Astana qalasy ákiminiń orynbasary Talǵat Rahmanberdi arnady. Ol jınalǵandardy merekemen quttyqtap, bul kúnniń el birligi men yntymaǵyn aıshyqtaıtynyn atap ótti. Táýelsizdik jyldarynda Qazaqstan memlekettiligin nyǵaıtyp, halyqaralyq arenada óz ornyn qalyptastyrdy.
-Zań – ár adamnyń quqyǵy men bostandyǵynyń kepili. Bizdiń basty mindetimiz – osy ustanymnyń mánin ár azamattyń tereń túsinýine yqpal etip, qoǵamnyń ortaq jáne mádenı qundylyqtaryn nyǵaıtý, – dedi elorda ákiminiń orynbasary.
Ol 2026 jyldyń Tsıfrlandyrý jáne jasandy ıntellekt jyly dep jarııalanýy elimizdiń jańa tehnologııalyq múmkindikterge jol ashýǵa umtylysyn kórsetetinin de atap ótti. Sonymen birge basty qozǵaýshy kúsh bilim, jaýapkershilik jáne adam ekenin aıtty.
Kontsert baǵdarlamasynda ónerdiń túrli janry qamtyldy. Sahnada opera ánshileri, balet ártisteri, kúıshiler jáne Astana Musical memlekettik teatrynyń ártisteri óner kórsetti. Sondaı-aq kórermen balalar shyǵarmashylyq ujymdarynyń ónerin tamashalady.
Kórermen aldynda Abylaı Tilepbergenov, Quralaı Meırambek, Aıgúl Qosanova, Madına Islıamova, Shuǵyla Ádephan, Jaqsylyq Saýqynbekov, Rahman Satıev, Marhaba Sábı, Álı Oqapov, «Keshıý» toby, El voice, sondaı-aq Qaırat Baekenov pen «Format» toby óner kórsetti.
Osyǵan deıin Astana men Almatyda ótip jatqan sharalar týraly jazdyq.
