Astanada Respýblıka kúni qalaı atap ótiledi
ASTANA. KAZINFORM – 25 qazanda Qazaqstanda Respýblıka kúni atap ótiledi. Ulttyq merekege oraı Astanada saltanatty, mádenı-tanymdyq, bilim berý, sporttyq, ekologııalyq jáne áleýmettik baǵyttaǵy 120-dan astam is-shara josparlanyp otyr.
Elorda turǵyndary men qonaqtaryna arnap kontsertter, kórmeler, spektaklder, sporttyq týrnırler, merekelik aktsııalar, jańa nysandardyń ashylýy jáne basqa da sharalar uıymdastyrylady.
Respýblıka kúnine oraı elordada birqatar jańa nysan ashylady. Atap aıtqanda, M. Tólebaev kóshesi, 3 mekenjaıynda «TANYM SPORT» kópfýnktsıonaldy kesheni, al Sultan Beıbarys kóshesi, 15 mekenjaıynda «TANYM ART» kesheni jumysyn bastaıdy.
Sonymen qatar № 2 kópbeıindi qalalyq balalar aýrýhanasynyń qosymsha ǵımaraty jáne № 2 qalalyq kópbeıindi aýrýhananyń qabyldaý-dıagnostıkalyq keshenin ashý josparlanyp otyr.
Ulttyq merekege oraı Astanada mádenı-bilim berý baǵdarlamasy da ázirlendi. Onyń aıasynda ádebıet pen óner ókilderimen kezdesýler, ǵylymı-praktıkalyq konferentsııalar, kórmeler, belgili bir taqyryptaǵy keshter, pikirsaıystar jáne basqa da is-sharalar ótedi.
20 qazanda saǵat 17:00–de «Jastar» saraıynda «Elim dep soqqan júregim» atty patrıottyq kesh ótedi. Sol kúni elordanyń barlyq mektebinde Respýblıka kúnine arnalǵan biryńǵaı synyp saǵaty uıymdastyrylady.
20-24 qazan aralyǵynda elordalyq mektepterde oqýshylar arasynda «Eger men Prezıdent bolsam…» taqyrybynda pikirsaıystar jáne «Meniń elim — Qazaqstan» atty sýret baıqaýy ótkiziledi.
21 qazanda saǵat 11:00–de Sáken Seıfýllın mýzeıinde «Ult rýhyn ulyqtaǵan Sáken» atty mádenı-tanymdyq kesh ótedi. Sol kúni Aqjan ál-Mashanı atyndaǵy № 92 mektep-lıtseıinde Ótegen Seıitov atyndaǵy «Bolashaq prokýror» klýbynyń qatysýshylary arasynda «QAZAQSTAN QUIZ» zııatkerlik oıyny uıymdastyrylady.
22 qazan kúni saǵat 11:00–de Dostyq úıinde Ǵylymı-saraptamalyq toptyń qatysýymen konferentsııa ótedi.
Sol kúni saǵat 11:00–de Ortalyq balalar men jasóspirimder kitaphanasynda jazýshy, dramatýrg Joltaı Jumat-Álmashulymen «Zerdeli ult — kitap oqıtyn otbasynan bastalady» taqyrybynda kezdesý uıymdastyrylady. Keıin kitaphanada «Ádebıet álemindegi túngi kerýen» atty ádebı is-shara ótedi. Ol kitaphanada tún ótkizý formatynda uıymdastyrylady.
Saǵat 19:00–de «Jastar» saraıynda «Astana» estradalyq-sımfonııalyq orkestri «Uly dala áýeni» atty merekelik kontserttik baǵdarlamasyn usynady.
23 qazanda saǵat 10:00–de Astana qalasynyń memlekettik arhıvinde oqýshylarmen «Egemen eldiń erteńi» atty kezdesý ótedi.
Saǵat 11:00–de M. Áýezov atyndaǵy Ortalyq qalalyq kitaphanada memleket jáne qoǵam qaıratkeri Saýytbek Ábdirahmanov pen tarıhshy, tarıh ǵylymdarynyń kandıdaty, professor Kúlpash Іlııasovanyń elordanyń belsendi jastarymen kezdesýi ótedi. Kezdesý «Baıtaq elim — Qazaqstan!» taqyrybyna arnalady.
Merekelik is-sharalar elordanyń alty aýdanyndaǵy Belsendi uzaq ómir súrý ortalyqtarynda da uıymdastyrylady.
23 qazanda saǵat 11:00–de R. Qoshqarbaev dańǵyly, 29/1 mekenjaıynda «Án-jyrym saǵan, Qazaqstan» atty merekelik kontserttik baǵdarlama ótedi. Sol kúni keshke mádenı baǵdarlama Memlekettik «NAZ» bı teatrynyń kontsertimen jalǵasady. Ujym saǵat 19:00–de «Ańsaǵan arman» atty kontsert usynady.
Sondaı-aq elordanyń barlyq alty aýdanynda merekelik kontsertter ótedi.
Atap aıtqanda, 24 qazanda Prıgorodnyı, Otaý, Ónerkásip, Baǵystan, Óndiris jáne Temirjolshylar turǵyn alaptarynda, «Qorǵaljyn», «Jaǵalaý», «Atatúrik», «Aıǵyrjal» jáne «Jastar» gúlzarlarynda, sondaı-aq qalalyq alańda kontserttik baǵdarlamalar uıymdastyrylady.
Respýblıka kúni — 25 qazan kúni de mazmundy baǵdarlama josparlanyp otyr. Saǵat 11:00–de Óner mýzeıi kelýshilerdi «Rýhty el» atty lektsııa-kontsertke shaqyrady. Al M. Gorkıı atyndaǵy Memlekettik akademııalyq orys drama teatry «Er-Tóstik týraly ańyz» ertegisin usynady.
Mýzykalyq jas kórermen teatry saǵat 16:00–de «Qazaqstan óneriniń maqtanyshtary» atty shyǵarmashylyq kesh ótkizedi. Saǵat 18:00–de «Abaı — Toǵjan» mýzykalyq dramasyn sahnalaıdy.
Osy ýaqytta Á. Mámbetov atyndaǵy Memlekettik drama jáne komedııa teatry «Jas Abaı» spektaklin kórsetedi.
Budan bólek, 25 qazanda áleýmettik osal sanattaǵy balalarǵa Qazaqstannyń Ulttyq mýzeıi men «Báıterek» monýmentine ekskýrsııalar uıymdastyrylady.
Mereke kúnderi elorda turǵyndary men qonaqtary aýyl sharýashylyǵy jármeńkesine de bara alady. Jármeńke 24-25 qazanda Qarqaraly tasjoly, 1 mekenjaıyndaǵy «Qazanat» ıppodromynyń avtoturaǵynda ótedi.
Jármeńkede Qaraǵandy jáne Qostanaı oblystarynyń sharýalary óz ónimderin usynady. Saýda oryndary saǵat 09:00–den 18:00–ge deıin jumys isteıdi. Kelýshiler jańa azyq-túlik ónimderin óndirýshilerdiń ózinen tıimdi baǵamen satyp ala alady.
Respýblıka kúnin merekeleý baǵdarlamasynda kásibı sportshylardy, jastardy jáne túrli jastaǵy qala turǵyndaryn biriktiretin sporttyq jarystarǵa da erekshe kóńil bólinedi.
15-17 qazan aralyǵynda «Barys Arenada» júzýden álem kýbogynyń kezeńi ótedi. Jarysty tamashalaý úshin bılet satyp alý qajet.
17-18 qazanda saǵat 09:00–den bastap Sana Sport sport kesheninde «Zań men tártip» qaǵıdaty aıasynda Astana ákimdigine qarasty uıymdardyń qyzmetkerleri arasynda voleıbol týrnıri ótedi.
19 qazanda Aqshoqy-2 mekenjaıyndaǵy Paralımpıadalyq jattyǵý ortalyǵynda kórý qabileti buzylǵan qatysýshylar arasynda toǵyzqumalaqtan Astana chempıonaty uıymdastyrylady. Erteńinde, 20 qazanda, saǵat 10:00–de osy ortalyqta estý jáne kórý qabileti buzylǵan qatysýshylar arasynda shahmattan ashyq qalalyq chempıonat ótedi.
22 qazanda saǵat 10:00–de Belsendi uzaq ómir súrý ortalyǵynda Esil aýdanynyń zeınetkerleri arasynda shahmat týrnıri uıymdastyrylady.
Sol kúni saǵat 14:00–de «MÝA» pedagogıkalyq kolledjinde Almaty aýdany kolledjderiniń stýdentteri arasynda ulttyq sport túrlerinen jarystar ótedi.
23 qazan kúni saǵat 10:00–de Qalamgerler alleıasynda Baıqońyr aýdanynyń turǵyndary arasynda ulttyq sport túrlerinen saıystar uıymdastyrylady. Qatysýshylar toǵyzqumalaq, asyq atý, armrestlıng jáne láńgi tebý sport túrlerinen baq synaıdy.
24 qazanda «Barys Arenada» kúres túrlerinen álem chempıonaty ótedi. Jarysqa arnaıy bıletpen kirýge bolady.
