Astanada reseılik modeler V. Zaıtsevtiń qazaqtyń ulttyq qamzoldarynyń avtorlyq toptamasy tanystyryldy

Sán áleminiń maıtalmany V. Zaıtsevtiń aıtýynsha, toptamanyń negizine qazaqtyń ulttyq qamzoldary, bas kıimderiniń úlgileri alynǵan. «Qazaqtyń ulttyq qamzoly negiz retinde alyndy jáne ózimizdiń sheshimimizge ulttyq taqyrypqa saı dáldik berý úshin ulttyq dástúr jalǵastyǵyn saqtaý kerek boldy. Qyzdardyń qamzoldarynyń jaǵasyna jáne erkekterdiń uzyn etekti súrtikterine ulttyq órnekter bastyryldy», dedi V. Zaıtsev jýrnalısterge bergen suhbatynda.

Bul V. Zaıtsevtiń ózge halyqtyń dástúrli kıim úlgilerine den qoıýynyń alǵashqy tájirıbesi. Degenmen reseılik sánger dástúrli sán úlgisinen ózgerek, tyń ıdeıa jasaýǵa tyrystym dedi. Jańa ulttyq kıimder toptamasyna sheberdiń barlyq ujymy bir aıǵa jýyq jumylǵan. Al teri buıymdaryn jasaýǵa onyń áriptes kásibı sheberhanalary tartylǵan.

«Qazaqstannyń ulttyq sán ındýstrııasy óte myqty damyǵan. Sondyqtan men úshin ıdeıa turǵysynda asa aýyr boldy. Otandyq sán naryǵynda bar úlgilerdi qaıtalap jatsam, bul meniń tarapymnan jiberilgen úlken ábestik bolar edi. Menińshe, jańa toptama laıyqty oryndaldy dep oılaımyn», dep atap kórsetti sánger.

Onyń aıtýynsha, ulttyq naqyshtaǵy jańa toptama qoǵamda bedeldi, qazirgi zamanǵy bıznes-hanymdarǵa, saıasatkerlerge laıyqtalǵan. Sondyqtan uıymdastyrýshylardyń oılastyrýymen Zaǵıpa Balıeva, Gúljan Qaraǵusova jáne Sábılá Mustafına synda elimizdiń belgili saıasatker hanymdary men memleket qaıratkerleri toptamanyń tanystyrylymyn jasady.

«Podıýmǵa manekenshiler emes, halyqqa eleýli, el arasynda tanymal adamdardyń shyǵýy erekshe áser beredi. Olardyń daralyǵy, ózindik keskin-kelbeti toptamaǵa jarqyndyq syılaıdy», deıdi toptama avtory.

Kıimder toptamasy «DıýMA» kıimder salonyna arnalǵan.