Astanada «RES 2026 EXPO» halyqaralyq jasyl jáne turaqty tehnologııalar kórmesi ótedi

ASTANA.KAZINFORM - 22-24 sáýir aralyǵynda Astanada «RES 2026 EXPO» halyqaralyq jasyl jáne turaqty tehnologııalar kórmesi ótedi. Aýqymdy is-shara Ortalyq Azııa elderiniń qatysýymen ótetin – Óńirlik ekonomıkalyq sammıt 2026 aıasynda uıymdastyrylyp, aımaqtyń turaqty damý salasyndaǵy negizgi dıalog alańyna aınalmaq.

Resmı ashylý saltanatyna Qazaqstan Prezıdenti Kasym‑Jomart Tokaev jáne Ortalyq Azııa memleketteriniń basshylarynyń qatysýy josparlanyp otyr. Bul kórmeniń joǵary halyqaralyq mártebesin jáne onyń óńirlik mańyzyn aıqyndaıdy. Іs-sharanyń uıymdastyrýshysy - Qazaqstan Ekologııa jáne tabıǵı resýrstar mınıstrligi. Іs-sharany uıymdastyrýǵa Halyqaralyq jasyl tehnologııalar jáne ınvestıtsııalyq jobalar ortalyǵy (IGTIC) qoldaý kórsetedi. Kórmeniń operatory - «BusinessFirst» JShS.

RES 2026 EXPO - ekologııalyq transformatsııaǵa baǵyttalǵan naqty tehnologııalar men ınnovatsııalyq sheshimderdi tanystyratyn kásibı platforma. Kórme aıasynda memleket ókilderi, halyqaralyq uıymdar, bıznes qurylymdar, qarjy ınstıtýttary, ǵylymı jáne sarapshylyq qaýymdastyǵy bas qosady. Іs-sharaǵa barlyǵy 30 elden 300-den joǵary kompanııa qatysyp, 1500 delegat pen 20 000-nan asa kórermen keledi dep josparlanǵan.

Kórme aýmaǵynda 8 taqyryptyq aımaq kórsetiledi:

1. Jasyl energetıka jáne dekarbonızatsııa.

Kún, jel jáne basqa taza energııa kózderin paıdalaný arqyly aýaǵa zııandy gazdardyń shyǵaryn azaıtý.

2. Sý resýrstaryn basqarý jáne aǵyn sýlardy tazartý.

Sýdy únemdi paıdalaný, ózender men kólderdi tazalaý, qaýipsiz sý júıelerin qurý.

3. Tsırkýlıarlyq ekonomıka jáne qaldyqtardy qaıta óńdeý.

Qaldyqtardy qaıta paıdalaný jáne jańa ónimder jasaý arqyly qorshaǵan ortany qorǵaý.

4. Aqyldy qalalar jáne turaqty ınfraqurylym.

Qalalardy yńǵaıly jáne ekologııalyq taza etýge arnalǵan tehnologııalar men sheshimder.

5. Klımattyq tehnologııalar jáne kómirtekti basqarý.

Kómirtek shyǵaryn azaıtý jáne klımatqa áserdi tómendetetin jańa tehnologııalar.

6. Bıoártúrlilik jáne ekojúıelerdi qalpyna keltirý.

Tabıǵattaǵy janýarlar men ósimdikterdiń alýan túrliligin saqtaý jáne zaqymdalǵan jerlerdi qalpyna keltirý.

7. Agro-tehnologııalar jáne azyq-túlik júıeleri.

Tıimdi jáne ekologııalyq taza aýyl sharýashylyǵy, jańa tehnologııalar arqyly turaqty azyq-túlik óndirisi.

8. ESG jáne jasyl qarjylandyrý.

Ekologııaǵa, áleýmettik jaýapkershilikke jáne durys basqarýǵa negizdelgen ınvestıtsııalar men bıznes jobalar.

Sondaı-aq kórme aıasynda birneshe arnaıy is-shara ótkiziledi. Olar qatysýshylarǵa tájirıbe almasýǵa, jańa ıdeıalarmen tanysýǵa jáne «jasyl» tehnologııalardy damytýǵa múmkindik beredi:

GREEN INVEST FORUM - ınvestorlar, bıznes jáne memleket ókilderiniń dıalog alańy. Forýmda «jasyl» ınvestıtsııalyq jobalardy tanystyrý, qarjylandyrý jáne halyqaralyq yntymaqtastyq máseleleri talqylanyp, B2B jáne B2G kezdesýleri uıymdastyrylady.

ECO STARTUP COMPETITION - ekologııalyq startaptar men ınnovatsııalyq sheshimderdi kórsetýge arnalǵan kásibı alań. Qatysýshylar jobalaryn tanystyryp, tájirıbe bólisip, turaqty damý salasyndaǵy jańa tehnologııalardy kórsetýge múmkindik alady.

GREEN RUNWAY FASHION SHOW - ekologııalyq taza materıaldar, qaıta óńdelgen matalar jáne tabıǵı boıaǵyshtar qoldanylǵan sán kollektsııalarynyń kórsetilimi. Shoý mádenıet, tabıǵat jáne ınnovatsııa baılanysyn kórsetedi.

ART EXHIBITION - tabıǵat, turaqty bolashaq jáne ekologııalyq qundylyqtarǵa arnalǵan kórkemdik ekspozıtsııa. Zamanaýı sýretshiler men avtorlyq stýdııalardyń jumystary ekologııalyq taqyryptardy ashady.

REGIONAL ECO FILM FESTIVAL - ekologııalyq jáne áleýmettik taqyryptaǵy kıno baǵdarlamasy. Kórme basty sahnasynda kórsetiletin fılmder turaqty damý, ekologııa, klımat, sý, bıoártúrlilik jáne ESG transformatsııasyna arnalǵan.

Osy is-sharalar RES 2026 EXPO kórmesin tek tehnologııalyq jańalyqtar ǵana emes, mádenı jáne áleýmettik bastamalardy biriktiretin ámbebap alańǵa aınaldyrady.

RES 2026 EXPO memlekettik sektor úshin bıznespen ashyq ári maǵynaly dıalog qurýǵa, ekologııalyq jáne ekonomıkalyq saıasattyń basymdyqtaryn usynýǵa jáne ulttyq jáne óńirlik baǵdarlamalardy iske asyrý úshin áriptester tabýǵa múmkindik beredi.

Aıta keteıik, Qazaqstan Germanııada ótip jatqan ITB Berlin halyqaralyq týrıstik kórmesine qatysyp jatyr. Atalǵan kórmege jyl saıyn álemniń 180 elinen 10 000-nan astam eksponent pen 160 000-ǵa jýyq kelýshi jınalady. Sonymen qatar is-sharaǵa 113 500-den astam týrızm salasynyń mamandary qatysady.