Astanada renovatsııaǵa jatatyn 178 úı bar

ASTANA. KAZINFORM — Búgin Qoǵamdyq keńes otyrysynda Astana qalasynda renovatsııaǵa jatatyn turǵyn úı nysandarynyń tizbesin bekitý máselesi qaraldy. Bul týraly Astana qalasynyń Turǵyn úı jáne turǵyn úı ınspektsııasy basqarmasynyń bastyǵy Anýar Saıpov málim etti.

Onyń aıtýynsha, qazirgi ýaqytta renovatsııa baǵdarlamasy aıasyndaǵy tizimge 178 kóppáterli turǵyn úı engizilgen. 2013 jyldan beri baǵdarlamany iske asyrý barysynda 18 myńnan astam turǵyn kóshirilgen.

— Baǵdarlama úsh kezeńnen turady. Birinshi kezeń 2013–2017 jyldar aralyǵyn qamtydy. Osy ýaqytta 228 apatty úıden 3 529 páterdiń turǵyndary kóshirildi. Ekinshi kezeń 2018–2022 jyldary júzege asyryldy. Bul kezeńde 54 apatty úıdegi 874 páterdiń turǵyndary jańa baspanaǵa kóshirildi. Úshinshi kezeń 2023–2029 jyldarǵa josparlanǵan. Bul kezeńde 206 apatty úıdegi 4 710 páterdiń turǵyndaryn kóshirý kózdelgen. Ótken jylǵa deıin 59 apatty úıdegi 1 742 páterdiń turǵyndary qonys aýdarǵan, — dedi ol. 

Spıkerdiń aıtýynsha, qazirgi ýaqytta jospar boıynsha 178 úıdi bekitý qajet. Al turǵyndardy jańa páterlermen qamtamasyz etý úshin qarjylandyrý oblıgatsııalyq qaryzdar esebinen júrgiziledi jáne qajetti qarajat qarastyrylǵan.

Buǵan deıin Qasym-Jomart Toqaev Aqmola oblysynda renovatsııa baǵdarlamasymen jańa qonysqa kóshken otbasymen áńgimeleskenin jazǵanbyz.

Sonymen qatar Kókshetaýda 100 otbasy renovatsııa baǵdarlamasy aıasynda jańa páterge ıe boldy.