Astanada rekordty kólemde mektepter salynyp jatyr

ASTANA. KAZINFORM — Astana qalasynyń ákimi Jeńis Qasymbek Instagram paraqshasynda aldaǵy oqý jylynda ashylatyn mektepter týraly jazdy.

Ákim qazir 30-dan astam mekteptiń qurylysy júrip jatqanyn aıtty. Onyń ishinde 90 myń oqýshyǵa arnalǵan eki aýysymdy 24 jaıly mektep bar.

«Astanada rekordty kólemde mektepter salynyp jatyr. Qazirgi ýaqytta 100 myńǵa jýyq oqýshy ornyna (eki aýysymdy) arnalǵan 30-dan astam mekteptiń qurylysy júrip jatyr. Olardyń arasynda «Jaıly mektep» ulttyq jobasy aıasynda Samruk-Kazyna Construction salatyn (2024-2025 jyldary) 90 myń oqýshy ornyna arnalǵan eki aýysymdy 24 jaıly mektep bar. Qalany aralaý barysynda QR Premer-Mınıstriniń birinshi orynbasary Roman Sklıarmen birge oqý jylynyń basynda ashylatyn jaıly mektepterge bardyq. Bul 8 mektep myna mekenjaılarda ornalasqan: Saryarqa aýdanynda Ulytaý men Naýryz kósheleriniń qıylysynda, Beıbarys Sultan kóshesinde, Nura aýdanynda Tóle bı kóshesi men 24 kósheniń qıylysynda, Esil aýdanynda Qabanbaı batyr dańǵyly men Syǵanaq kóshesiniń qıylysynda, Nura aýdanynda Tóle bı kóshesi, 31 mekenjaıynda, Máńgilik el dańǵyly men E-497 kóshesiniń qıylysynda, Orynbor kóshesi men №37 kósheniń qıylysynda, Almaty aýdanynda A.Baıtursynov kóshesinde. Sondaı-aq, oqý jylynyń basynda joǵaryda atalǵan oqý oryndarynan basqa taǵy úsh memlekettik jáne bir jeke mektep ashý josparlanyp otyr. Sol sııaqty jyl sońyna deıin taǵy 7 jaıly mektep, 5 memlekettik jáne 3 jekemenshik mektep ashý josparda bar. Osylaısha, jańa oqý jyly barysynda 23 mekteptiń qurylysy aıaqtalady», – delingen habarlamada.