Astanada regeneratıvti medıtsına jáne tindik ınjenerııa zerthanasy qurylady
ASTANA. 11 shilde. QazAqparat - «Nazarbaev Ýnıversıtetiniń» Ómir týraly ǵylymdar ortalyǵynyń bazasynda regeneratıvti medıtsına jáne tindik ınjenerııa, jasýshalyq tehnologııa jáne bıoınjenerııadan pánaralyq zerthana qurylady, dep habarlady Ómir týraly ǵylymdar ortalyǵynyń baspasóz qyzmeti pm.kz saıty úshin.
Pıttsbýrg ýnıversıtetiniń qatysýymen uıymdastyrylatyn atalmysh zerthana amerıkandyq ýınversıtettiń zerthanasyna uqsaıtyn bolady. Mundaı erekshe zerthananyń bolýy Astanaǵa eldegi halyqaralyq bıotehnologııalyq ortalyq bolýǵa múmkindik beredi.
Burynda aıtylǵandaı, Pıttsbýrg ýnıversıteti Ómir týraly ǵylymdar ortalyǵynyń strategııalyq seriktesi bolyp tabylady. Ýnıversıtetter yntymaqtastyǵy adıpozdy dińgekti jasýsha, pedıatrııadaǵy tindik ınjenerııa jáne qaterli isikti zertteý jónindegi jalpy jobalardy iske asyrýdy qolǵa almaqshy.
Sonymen qatar tinder regeneratsııasy men bıoreaktorlyq tehnologııalarda gıdrodınamıkalyq qarsylyqty tómendetý úshin qanda erıtin polımerlerdi, bıopolımerlerdi jáne dińgekti jasýshalardy qoldaný arqyly donor organynyń perfýzııasyn iske asyrýǵa arnalǵan jańa tehnologııalardy qurý jónindegi jobalar ázirlenýde.
«Pıttsbýrg ýnıversıteti sondaı-aq, «Nazarbaev Ýnıversıtetiniń» Medıtsına Mektebin qurýdaǵy da seriktesi», - delingen baspasóz qyzmetiniń habarynda.
Amerıkandyq oqý ornymen yntymaqtasý aıasynda Ortalyq Azııadaǵy jahandyq medıtsına týraly alǵashqy ınternet-jýrnal quryldy. Onda otandyq jáne sheteldik zertteýshiler óz jumystaryn jarııalaı alatyn bolady. Bul týraly «Nazarbaev Ýnıversıteti» Ómir týraly ǵylymdar ortalyǵynyń bas dırektory Jaqsybaı Jumadilov pm.kz saıtyna bergen suhbatynda aıtyp ótti.
«Pıttsbýrg ýnıversıteti «Nazarbaev Ýnıversıteti» Ómir týraly ǵylymdar ortalyǵynyń strategııalyq seriktesi bolyp tabylady. Yntymaqtastyq ǵylymúddesine, bilim berý jobalaryna qatysty, sondaı-aq densaýlyq saqtaý máselelerine, onyń ishinde jahandyq densaýlyq salasyndaǵy kóptegen suraqtarǵa jaýap izdeıdi», - dedi ortalyqtyń bas dırektory.
«Jahandyq densaýlyq saqtaýdyń Orta Azııalyq jýrnaly» dep atalatyn basylymnyń ereksheligi sol, onda barlyq otandyq ǵalymdar ózderiniń ǵylymı zertteýleri men ázirlemelerin jarııalaı alady.
«Biz atalǵan jýrnal ǵalymdarǵa jahandyq densaýlyq saqtaýdyń kókeıkesti máselelerimen bólisip, ǵylymı zertteýlerdiń deńgeıin joǵarylatýǵa yntalandyratyn tıimdi sheshim tabýǵa múmkindik beredi dep oılaımyz», - dep aıaqtady sózin J.Jumadilov.
