Astanada referendýmdy qoldaýǵa baǵyttalǵan jastar kontsertine 10 myńnan astam keldi

ASTANA. KAZINFORM - Elorda jastary Konstıtýtsııalyq reformaǵa qoldaý kórsetip, live-kontsertke qatysty. Іs-shara 10 myńnan astam adamdy biriktirip, «Ádiletti jáne Progressıvti Qazaqstannyń Halyqtyq Konstıtýtsııasy úshin!» Jalpyulttyq koalıtsııasy jumysy aıasyndaǵy alǵashqy iri qoǵamdyq alańdardyń birine aınaldy.

Astana ákimdigi resmı saıtynyń habarlaýynsha, kontsert barysynda qazaqstandyqtardy aldaǵy referendýmǵa qatysyp, jańa Konstıtýtsııa jobasy boıynsha óz ustanymyn bildirýge úndeý jasaldy.

Memleket basshysy Qasym-Jomart Toqaev atap ótkendeı, konstıtýtsııalyq ózgerister – eldegi júıeli saıası jańǵyrýdyń jalǵasy.

Onyń aıtýynsha, reformalardyń negizgi maqsaty – ádildik pen zań ústemdigi qaǵıdattaryn nyǵaıtý, ókildi ınstıtýttardyń rólin kúsheıtý jáne bılik tarmaqtarynyń ózara is-qımylynyń neǵurlym teńgerimdi modelin qalyptastyrý. Prezıdent usynylǵan ózgeristerdiń mánin ashyq túrde qoǵam talqysyna shyǵaryp, halyqty keńinen aqparattandyrý mańyzdy ekenin de atap ótken edi.

Іs-shara qoǵamdyq mádenı aktsııa formatynda ótip, oǵan elorda turǵyndary men qonaqtary jınaldy. Sahnada belgili qazaqstandyq oryndaýshylar – Raim, Dastan Orazbekov, Bayansulu, Nazzarbeck, Aqtoty Bolshova jáne ózge de ártister óner kórsetti.

Kontserttik baǵdarlama Jalpyulttyq koalıtsııa músheleriniń taqyryp aıasyndaǵy baıandamalarymen jalǵasyn tapty. Jarqynbek Amantaı, Maqsat Tolyqbaı, Áıgerim Esenáli, Aqerke Eskendirova jańa Konstıtýtsııa jobasynyń negizgi baǵyttary boıynsha túsindirý jumystaryn júrgizip, aldaǵy referendým týraly azamattardy habardar etti. Sondaı-aq olar sanaly tańdaý jasaý men belsendi azamattyq ustanymnyń mańyzyn atap ótti.

Óz sózinde Jarqynbek Amantaı konstıtýtsııalyq ózgerister eldiń saıası damýynyń jańa kezeńin jáne búgingi reformalar arqyly júzege asyp otyrǵan jańǵyrýdyń tarıhı áleýetin aıqyndaıtynyn atap ótti.

- Ata zańymyz zaman talabyn saı jáne jańa syn-tegeýrinderdi eskere otyryp ázirlendi. Bul elimizdiń damýyna jáne múddesin qorǵaýǵa múmkindik beredi. Árbir qazaqstandyq referendýmǵa qatysý arqyly óz azamattyq ustanymyn bildirip, ádiletti, ashyq ári zamanaýı memlekettiń damýyna úles qosýǵa tıis, – dedi ol.

Al Maqsat Tolyqbaı Jańa Konstıtýtsııa jobasy el damýynyń zamanaýı basymdyqtaryn aıqyndaıtynyn jáne Egemendik pen azamattardyń quqyqtaryn qorǵaý kepildikterin kúsheıtetinin atap ótti.

- Qujatta bilim, ǵylym, ınnovatsııa memlekettiń basty strategııalyq baǵyty, negizgi qundylyǵy retinde aıqyndaldy. Qoldanystaǵy Konstıtýtsııada halyqtyń memlekettik bıliktiń qaınar kózi ekeni jazylsa, al jańa qujatta memlekettik bıliktiń birden-bir bastaýy jáne Egemendiktiń ıesi ekeni bekitildi, – dedi Maqsat Tolyqbaı.

Akerke Eskendirovanyń aıtýynsha, jańa Konstıtýtsııa jobasy azamattardyń qatysý aıasyn keńeıtip, jastardyń qoǵamdyq protsesterge belsendi aralasýyna jaǵdaı jasaıdy.

- Usynylyp otyrǵan ózgeristerdiń túpki máni – táýelsizdigimizdi nyǵaıtý, qorǵaý jáne jańa býynǵa qýatty memleketti amanat etý. Aldaǵy referendým – bul jaı ǵana daýys berý emes, árqaısymyzdyń el taǵdyryna qosatyn úlesimiz. «Meniń pikirim mańyzdy» dep aıtý múmkindigi. Bolashaq óz qolymyzda, – dedi ol.

Sonymen qatar Áıgerim Esenáli eldiń quqyqtyq negizin qazirgi zaman talabyna saı jańǵyrtý qajet ekenin atap ótti.

- Elimizdiń damýyna jańa qaǵıdalar men zamanaýı zańnamalyq sheshimder bolýǵa tıis. Balalarymyzdyń, jastarymyzdyń bolashaǵy jarqyn ári senimdi bolýy úshin bizge Jańa Konstıtýtsııa qajet, – dedi Áıgerim Esenáli.

Uıymdastyrýshylardyń málimdeýinshe, is-shara 10 myńnan astam adamdy biriktirip, Jalpyulttyq túsindirý naýqany aıasyndaǵy alǵashqy aýqymdy qoǵamdyq alańdardyń birine aınaldy.

Esterińizge sala keteıik, buǵan deıin jetekshi saıası partııalar men qoǵamdyq uıymdar ókilderin biriktirgen koalıtsııa qurylǵany týraly habarlandy.

Aıta keteıik, keshe Konstıtýtsııa jobasyna arnalǵan «Referendým–2026» onlaın-marafony ótti.