Astanada rámizder kúnine arnalǵan velojarys ótti

ASTANA. QazAqparat - Búgin Astanada QR Memlekettik rámizder kúnine arnalǵan velojarys ótti, dep habarlaıdy qala ákimdiginiń saıty.

Jyl saıyn sharaǵa 2,5 myń adam qatysady. Olardyń qatarynda kásibı sportshylar da áýesqoılar da bar. Olar Qabanbaı batyr-Qorǵaljyn tasjoly -Turan dańǵyly baǵyttary boıynsha júrip ótip, «Astana-Arena» stadıonynda márege jetti. Velo sportshylar 10,5 shaqyrym qashyqtyqty baǵyndyrdy.
-Alǵashqy jarys EKSPO-2017 halyqaralyq kórmesin qoldaý maqsatynda velo maýsymnyń ashylýyna oraı, 20 mamyr kúni ótti. Osydan soń kópshiliktiń suraýy boıynsha qalalyq ákimdiktiń, dene shynyqtyrý jáne sport basqarmasynyń, Astana qalasynyń buqaralyq sport is-sharalaryn ótkizý dırektsııasynyń bastamasymen memlekettik rámizder kúnine arnalyp velojarys taǵy da ótkizildi, - deıdi uıymdastyrýshylar.