Astanada «Radıologııa - 2010» atty halyqaralyq ǵylymı-tájirıbelik konferentsııa bastaldy
ASTANA. Tamyzdyń 26-sy. QazAqparat /Jasulan Amanbaıuly/ - Astanada «Radıologııa - 2010» atty halyqaralyq ǵylymı-tájirıbelik konferentsııa bastaldy, dep habarlaıdy QazAqparat.
Atalmysh shara General Elektric kompanııasynyń medıtsınalyq saladaǵy qural-jabdyqtardy shyǵaratyn Healthcare bólimshesi, Qazaqstannyń radıologtarynyń qaýymdastyǵynyń uıymdastyrýymen, Densaýlyq saqtaý mınıstrliginiń jáne Nazarbaev ýnıversıtetiniń qoldaýymen ótkizilip otyr.
Rentgen sáýleleri ashylýynyń 112 jyldyǵy qarsańynda ótip otyrǵan májiliske Germanııa, Italııa, Anglııa, Reseı, Qazaqstan elinen kelgen medıtsınanyń osy saladaǵy mamandary qatysýda.
«Elordadaǵy «Ulttyq medıtsınalyq holdıngi» AQ-nyń quramyna kiretin Respýblıkalyq neırohırýrgııa ǵylymı ortalyǵynnyń aýmaǵynda uıymdastyrylǵan konferentsııa búgingi negizgi otyrysynan keıin, neıroradıologııa, jańa tehnologııalar arqyly túrli qaterli aýrýlardy erte anyqtaý jáne ony emdeý boıynsha sheberlik synyptary, semınarlar men tájirıbelik sabaqtar ótkiziletin bolady», deıdi General Elektric Healthcare kompanııasynyń TMD-daǵy aımaqtyq dırektory Elena Kýcherýk.
Al konferentsııanyń ekinshi kúninde №2 qalalyq klınıkalyq emhanasynyń bazasynda tájirıbelik sabaqtar ótkiziledi. Bul emhanada GE Healthcare kompanııasy trenıng ortalyq ashýdy josparlap otyr.
«Konferentsııanyń negizgi maqsaty - aǵartýshylyq. Dárigerler radıologtar medıtsınanyń osy salasyndaǵy jańa tehnologııalarmen tanysýyna, ózderine qajetti qural-jabdyqtardy tańdaýyna jaǵdaı jasaý. ózderinde bar tehnıkany tıimdi qoldana alý biliktiligin arttyrý», dep atap kórsetti E. Kýcherýk.
Onyń aıtýynsha, halyqaralyq deńgeıde ótip jatqan radıologııalyq forýmǵa qatysýshy elderdiń jınaqtalǵan tájirıbeleri men bilimderin eskere otyryp, ony damytýdyń perspektıvalaryn aıqyndaý jaǵy da tys qalmaq emes.
Bul konferentsııada Nazarbaev ýnıversıteti óziniń medıtsınalyq fakýltetiniń bilim baǵdarlamasy jasaqtalýyna baılanysty, jekeleı ǵylymı baıandamalardy da qosý týraly usynys tastaǵan. Olardy molekýlıarlyq tehnologııalar taqyrybyndaǵy jekeleı tustar qyzyqtyrǵan kórinedi.
Jıynda Reseı professorlary N. Rojkova, V. Kornıenko, M. Goncharov (Máskeý), P. V. Balahnın (Sankt-Peterbor), D. Solovev (Cambridge Research institute) jáne Qazaqstan radıologtary qaýymdastyǵynyń prezıdenti, professor J. Hamzabaev baıandama jasaıdy.
