Astanada Qyr Space jańa kreatıvtik keńistigi iske qosyldy
Taqyryptyq kórmeler avtory jáne fotograf Ospan Áli (Álibek Ibraev) Qyr Space keńistigin iske qosty. Bul fotograftar, vıdeograftar, ǵalymdar, qolónershiler jáne basqa da shyǵarmashylyq adamdary óz oılaryn kreatıvti túrde júzege asyra alatyn alań.
Jańa kreatıvtik keńistiktiń tanystyrylymy 16 jeltoqsanda EXPO aýmaǵynda QYRlike kórme formaty túrinde ótti, dep habarlaıdy Kazinform.
«Shyǵarmashylyq adamdaryna kóbine óz oılary men ıdeıalaryn aýyzsha nemese jazbasha jetkizý qıynǵa soǵyp jatady. Al biz sony basqasha jetkizemiz. Meniń oılarym foto arqyly jetedi. Al bireýler óz ıdeıalaryn músin, kórkem sýret jáne basqa da joldarmen jetkizedi. Biz óz oılarymyzdy qolóner, vızýaldy dúnıeler arqyly aıtamyz. Osy rette Qyr Space oılar men ıdeıalardy kórsetýdiń habine aınalýy kerek», - deıdi Ospan Áli óziniń jobasy týraly.
Ospan Áli buǵan deıin ondaǵan fotokórmeler uıymdastyrǵan, máselen, olardyń qatarynda BUU-da (Jeneva) ótkizgen Men Qazaq Dalasynyn Qyzymyn nemese «Qazaqstan – Uly dala eli» kórmesi bar. Sońǵy ótkizgen kórmeleriniń biri — astanalyq hospıs qyzmetkerleri men naýqastaryna arnalǵan AqJaima jobasy. Osy tusta aıta ketsek, joba tanystyrylymy kezinde qatysýshylardy tabaldyryqtan attaı bergende aq jaımamen qarsy alady.
«Esikten kiretin jerge eki tósek jaıma ilip qoıdyq. Bireýi qaptamasy endi ashylǵan qyzyl tústi jańa bolsa, ekinshisi hospısten ákelingen qoldanylǵan aq tústi jaıma. Munyń máni – esikten engen árbir adam qaı jaıma arqyly kiretinin ózi tańdaıdy. Tósek jaıma – ózimizge ar aldyndaǵy tazalyǵymyz saqtalatyn jalǵyz ıntımdi keńistik. Kúni boıy sharshap, kesh batqanda biz tósegimizge oralamyz, sol kezde tósek jaıma bizdiń tańnan keshke deıin boıymyzǵa jınaǵan san túrli jaman da, jaqsy da kóńil-kúı, sezimimizdi ózine sińirip alatyn zat sekildi. AqJaima jobasynyń negizgi maqsaty – keshirý, boıymyzdy, oıymyzdy teris oıdan, sezimnen bosatý. Sebebi bizdiń erteń tańda oıanarymyz, oıanbasamyz belgisiz», — deıdi Ospan Áli.
Sonymen qatar kórmede qolónershiler men sýretshiler de óz jumystaryn usyndy. Máselen, Gozın retinde tanymal Janǵazy Seıdahmet Ospan Áliniń oılaryn júzege asyrýǵa kómektesti, ıaǵnı tapsyryspen zamanaýı dástúrli stılde sandyq jasady. Bul bıyl kúzde Ospan Áli qarjy jınaý týraly habarlaǵanda osy jobany qoldaǵandarǵa arnalǵan.
«Biz ádette qarjyny negizinen aýrýǵa shaldyqqan naýqastardyń emine jáne ómirlik qıyn jaǵdaıǵa tap bolǵandarǵa kómek retinde jınaýǵa úırenip qalǵanbyz. QyrSpace úshin qarjy jınaý keısi adamdardyń jańa bastamalardy qoldaýǵa, kez kelgen bir ıgi isti damytýǵa úles qosýǵa daıyn ekendigin kórsetedi. Meniń adamdarym – meniń baılyǵym. Osy jaǵynan alǵanda QyrSpace bizdiń ortaq jobamyz dep sanaýǵa bolady. Sandyqtyń qaqpaǵyna biz esimin jazǵan árbir adam osy jobaǵa, kreatıvti ındýstrııany damytýǵa úlesin qosty», - dedi ol.
Sondaı-aq QYRlike kórmesinde Aıbar Seısenbiniń (sýretshi), Jadyragúl Jıenǵazıevanyń (Jady dızaıneri), Janna Nógerbektiń (sýretshi) jáne Talǵat Shiderbaevtyń (sýretshi) jumystary qoıylyp, tanystyryldy.
Ospan Áliniń aıtýynsha, kórmeniń ataýy da sózder «oıynyn» bildiredi.
QyrSpace kórmesinde vorkshoptar men shyǵarmashylyq keshter ótkizý josparlanýda, olar týraly joba avtorlary áleýmettik jelilerde jarııalaıdy.
Posmotret etý pýblıkatsııý v Instagram
