Astanada psıhıkalyq dertke shaldyqqan 6 adamnyń júrgizýshi kýáligi bar - prokýratýra
ASTANA. KAZINFORM — Astana qalasynyń prokýratýrasy psıhıkalyq aýrýyna baılanysty qylmystyq jaýaptylyqtan bosatylǵan jáne medıtsınalyq qarsy kórsetilim tizimine engen tulǵalardyń kólik quraldaryn basqarý quqyǵyn tekserý nátıjesin jarııalady.
Taldaý kórsetkendeı, medıtsınalyq qarsy kórsetilimder tizimine sáıkes kólik quraldaryn qaýipsiz basqarýǵa tyıym salynǵan 76 adamnyń ishinde 6 azamattyń qoldanystaǵy júrgizýshi kýálikteri bar ekeni anyqtaldy.
- Osyǵan baılanysty, elorda prokýratýrasy júrgizýshige qatysty azamattyq talap aryz berip, sot 2025 jylǵy 2 shildedegi sheshimimen atalmysh azamattyń kólik quralyn basqarý quqyǵyn toqtatty.
Aýdandyq prokýratýralar uqsas talap-aryzdyq jumystar júrgizip, barlyǵy 4 talap aryz sotpen qanaǵattandyrylǵan, - dep jazdy baqylaýshy organnan.
Taldaý nátıjeleri boıynsha Qylmystyq kodekstiń 16 jáne 91-baptaryna ózgerister engizý usynyldy. Bul ózgerister sotqa psıhıkalyq aýrýǵa baılanysty qylmystyq jaýaptylyqtan bosatylǵan adamdarǵa qatysty kólik quralyn basqarý quqyǵyn toqtatý máselesin qatar qaraýǵa múmkindik beredi.
Aıta keteıik, Abaı oblysynda psıhıkalyq aýrýy bar 62 adam kólik aıdap júrgen.