Astanada probatsııadaǵy 12 adam tyıym salynǵan zat qoldanǵany úshin jaýapqa tartyldy
ASTANA. KAZINFORM – Astanada probatsııalyq baqylaýdaǵy sottalǵandar arasynda psıhoaktıvti zattardy medıtsınalyq emes maqsatta qoldaný faktilerin anyqtaý jóninde jedel-profılaktıkalyq is-shara ótkizildi.
Prokýratýranyń málimetinshe, is-shara barysynda 69 adam tekserýden ótti. Mamannyń qorytyndysy boıynsha olardyń 12-si tyıym salynǵan zattardy qoldanǵany anyqtaldy.
- Sot qaýlysymen bul azamattar Ákimshilik quqyq buzýshylyq týraly kodekstiń 440-1-baby boıynsha jaýapkershilikke tartyldy. Nátıjesinde 10 adam ákimshilik qamaqqa alynyp, 2 adamǵa aıyppul salyndy, - delingen aqparatta.
Prokýratýra ókilderiniń aıtýynsha, atalǵan sharalar qaıtalanatyn quqyq buzýshylyqtardyń aldyn alýǵa, probatsııada júrgen azamattardyń zańǵa jáne salaýatty ómir saltyna degen sanaly kózqarasyn qalyptastyrýǵa, sondaı-aq qoǵamdyq qaýipsizdikti nyǵaıtýǵa baǵyttalǵan.
Aıta keteıik, Taldyqorǵanda sıntetıkalyq esirtkimen ustalǵan kúdikti qamaýǵa alyndy.