Astanada Prezıdenttik shyrshaǵa elimizdiń ár óńirinen 100-den astam bala qatysty
ASTANA.KAZINFORM – Saltanatty sharaǵa elimizdiń barlyq óńirinen oqý, sport, shyǵarmashylyq jáne qoǵamdyq salada jetistikke jetken, sondaı-aq áleýmettik osal sanattaǵy 100-den astam bala qatysty.
– Prezıdenttik shyrsha jyl saıyn ótkiziledi. Bıyl respýblıka boıynsha bul merekege 4 myńnan astam bala qatysady, onyń 100-i respýblıkalyq deńgeıde shaqyrylǵan balalar, – dedi Oqý-aǵartý mınıstri Juldyz Súleımenova.
Uıymdastyrýshylardyń aıtýynsha, merekelik baǵdarlama balalardyń qyzyǵýshylyǵyn arttyrýǵa jáne este qalarlyq áser syılaýǵa baǵyttalǵan. Prezıdenttik shyrshaǵa kelgen balalardyń ishinde Aqtóbe oblysynyń oqýshysy Al-Farabı de bar.
– Aqtóbe oblysynan keldim, 6-synypta oqımyn. Kishkentaı kezimnen án aıtamyn. Bolashaqta ánshi bolǵym keledi. Interaktıvti zaldaǵy barlyq beketterge baryp shyqtym. Barshańyzdy Jańa jylmen quttyqtaımyn, – dedi ol.
Sondaı aq Al-Farabı suhbat barysynda «Moldabaı» ánin shyrqap berdi.
Іs-shara eki negizgi bólimnen turdy. Aldymen balalarǵa arnalǵan ınteraktıvti aımaq jumys istedi. Atalǵan aımaqta bes arnaıy beket uıymdastyryldy.
Atap aıtqanda, qatysýshylar VR kózildirigi arqyly vırtýaldy keńistikke saıahat jasady, akvagrım aımaǵynda sýret saldyrdy, syılyq taratylatyn alańda merekelik tartýlar aldy. Sonymen qatar kaleıdoskop stılindegi fotobekette estelik sýretke túsip, jasandy ıntellekt kómegimen fotosýretterin óńdetý múmkindigine ıe boldy.
– Biz barlyq zamanaýı tehnologııalardy kórsetýge tyrystyq. Munda shalǵaı aýyldardan kelgen balalar da bar, olardyń kópshiligi Astanaǵa alǵash ret kelip otyr, – dedi Oqý-aǵartý mınıstrligi Tárbıe jumysy jáne qosymsha bilim berý departamentiniń dırektory Erlan Qalmaqov.
Merekelik baǵdarlamanyń ekinshi bóliginde sahnalyq qoıylym men resmı marapattaý, syılyq tartý bólimi ótti.
Aıta keteıik, elordada jańa jyl qarsańynda 40-tan astam shyrsha shamyn jaqty. Soǵan oraı, qala turǵyndary men qonaqtary úshin aýqymdy merekelik is-sharalar ótkenin jazǵan edik.