Astanada Prezıdent teleradıokesheniniń «Hronıkadan – bolashaqqa» atty kınolektorııi bastaldy

Qazaqstan Respýblıkasy Prezıdenti Teleradıokesheniniń 30 jyldyǵy aıasynda qolǵa alynǵan bul aýqymdy aǵartýshylyq joba – buqaralyq mádenıet pen tanymdyq bilim berýdi ushtastyrǵan biregeı alańǵa aınalyp otyr.

Memleket basshysy Qasym-Jomart Toqaev atap ótkendeı: «Kıno men óner – tól mádenıetimizdi álemdik arenada tanytyp, elimizge degen maqtanysh sezimin oıatatyn mańyzdy quralǵa aınalyp keledi».

Elordalyq Kinopark kınoteatrynda ARAL derekti fılminiń tusaýkeseri ótti. Bul – búkil ǵumyryn Aral teńizinde balyq aýlaýǵa arnaǵan Kúntýǵan Turǵynbaev týraly portret-fılm. Derekti fılmdi Prezıdent teleradıokesheniniń jeke prodakshn-bazasy Derekti kıno ortalyǵy túsirgen.

Ortalyqtyń dırektory Aqylbek Shaljanov kópshilik aldynda sóz sóıledi.

-Kınolektorııdiń «Hronıkadan – bolashaqqa» dep atalýy kezdeısoq emes. Hronıka – bul ótken oqıǵa, kameraǵa taspalanyp, kadrda saqtalǵan tarıh. Derekti kıno ortalyǵy táýelsiz Qazaqstannyń shejiresin jınaqtaýdy jalǵastyryp keledi. Kınolektorıı – tek fılm kórsetilimi ǵana emes, shynaıy dıalog, erkin suhbat. Alda avtorlarmen kezdesý, Qazaqstannyń bolashaǵy týraly talqylaýlar men pikirtalastar kútip tur, - dedi Derekti kıno ortalyǵynyń dırektory.

ARAL derekti fılmi kórermenniń erekshe yqylasyna bólendi. Kórsetilimnen keıin shyǵarmashylyq top ókilderi qoıýshy rejısser, stsenarıı avtory, prodıýser jáne montaj rejısserimen kezdesý ótti.

Kórsetilimnen keıin Qazaqstan Respýblıkasy Prezıdentiniń keńesshisi, qoǵam qaıratkeri B. Omarov derekti fılm týraly óz oıyn ortaǵa saldy.

- Derekti fılmniń shyǵarmashylyq toby obekt retinde Araldy, basty keıipker retinde Kúntýǵan aqsaqaldy óte sátti tańdaǵan. Buǵan deıingi Aral týraly fılmder tek tragedııany qamtysa, bul fılmde basty keıipker arqyly teńizdiń oralatynyna bir úmit berdi. Prezıdent Teleradıokesheni Derekti kıno ortalyǵynyń shyǵarmashylyq tobyn osyndaı mazmundy dúnıeni jaryqqa shyǵarýymen quttyqtaımyn, - dedi ol.

Keshtiń eshkim kútpegen eń áserli sáti – fılmniń bas keıipkeri, balyqshy Kúntýǵan Turǵynbaevtyń kórermender arasynda otyrýy edi. Ol qonaqtarmen birge derekti fılmdi úlken ekrannan alǵash ret tamashalady. Bas keıipker jurtshylyqpen kezdesip, basynan ótkenimen bólisý úshin Aral aýdany, Qaratereń aýylynan arnaıy at basyn burǵan eken. Balyqshynyń aǵynan jarylyp aıtqan áńgimesi kópshilikti beıjaı qaldyrmady.

- Meniń búkil ǵumyrym osy Araldyń jaǵasynda ótti. Teńiz bizdiń ótkenimiz, búginimiz jáne keleshegimiz. Jerlesterimniń atynan Prezıdentimiz Qasym-Jomart Toqaevqa zor alǵys aıtamyn. Halyq onyń Aral teńizine, halqyna degen shynaıy qamqorlyǵyn eshqashan umytpaıdy. Fılm avtorlaryna da myń da bir rahmet. Búgin osynda kelip, Araldyń umyt qalmaǵanyn kórý – men úshin zor mártebe, - dedi Kúntýǵan Turǵynbaev.

Búginde Aral teńiziniń taǵdyry – balyqshy Kúntýǵan Turǵynbaevtyń jeke basynyń muńy ǵana emes, halyqaralyq saıasattyń da ózekti taqyryby. Prezıdent Qasym-Jomart Toqaevtyń bastamasymen aımaq elderi Halyqaralyq Araldy qutqarý qorynyń jumysyn jandandyrdy. Teńizdi qalpyna keltirý boıynsha birlesken jobalar júzege asyrylyp jatyr.

Qazir Soltústik Aralda sý kólemi artyp keledi. Balyq aýlaý jıiledi. Aýyldarda tirshilik qaıta jandanýda. Aımaq tirshilik, ári jańa múmkindikter mekeni retinde álem kartasyna qaıta oralyp jatyr.

Respýblıkalyq kınolektorıı Qazaqstannyń 20 qalasyn qamtıdy. Astanadan keıin fılm kórsetilimi Shymkent, Qyzylorda, Túrkistan, Taraz, Aqtaý, Atyraý, Oral, Aqtóbe, Óskemen, Semeı, Pavlodar, Petropavl, Qostanaı, Jezqazǵan, Qaraǵandy, Kókshetaý, Taldyqorǵan jáne Qonaev qalalarynda jalǵasady.

Qorytyndy kórsetilim 25 qyrkúıekte Almaty qalasynda ótedi. Kınolektorıı barysynda Prezıdent teleradıokesheniniń úzdik avtorlyq derekti fılmderi usynylady. Kórsetilimder oblys ákimdikteriniń qoldaýymen óńirlik kınoteatrlarda ótedi. Kórermen úshin kirý tegin.

Kórsetilim kestesi men kınolektorıı baǵdarlamasy Prezıdent teleradıokesheniniń resmı resýrstarynda jáne seriktes platformalarda jarııalanatyn bolady. Kórermen kınolektorıı kestesimen aldyn ala tanysyp, óz qalasyndaǵy kórsetilimge qatysa alady.

«Hronıkadan – bolashaqqa» respýblıkalyq kınolektorııiniń basty maqsaty – Qazaqstannyń qazirgi tarıhyn baıandaıtyn derekti kınony dáripteý. Bul joba el ómirindegi mańyzdy oqıǵalardy taspalap, memlekettiń beıneshejiresin túzý baǵytynda Prezıdent teleradıokesheniniń mıssııasyn jalǵastyrady.