Astanada Prezıdent atynan jańa Konstıtýtsııanyń arnaıy basylymy tabystaldy
ASTANA. KAZINFORM – Astanada Qazaqstannyń jańa Konstıtýtsııasynyń arnaıy basylymyn saltanatty túrde tabystaý rásimi ótti. Memleket basshysy Qasym-Jomart Toqaevtyń hatymen birge basylym danalaryn Premer-mınıstrdiń orynbasary – Mádenıet jáne aqparat mınıstri Aıda Balaeva tabystady.
QR Mádeıet jáne aqparat mınıstrligi bapasóz qyzmetiniń habarlaýynsha, arnaıy basylym shyǵarmashylyq jáne ǵylymı zııaly qaýym ókilderine, sondaı-aq Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııa múshelerine berildi.
Jıynda Aıda Balaeva jańa Konstıtýtsııanyń qabyldanýy Qasym-Jomart Toqaev 2019 jyly bastaǵan saıası jáne qoǵamdyq jańǵyrýlardyń zańdy jalǵasy ekenin atap ótti. Úkimet basshysynyń orynbasary Konstıtýtsııanyń mańyzy onda bekitilgen quqyqtyq normalarmen ǵana emes, eń aldymen, onyń ózegine aınalǵan qundylyqtarmen aıqyndalatynyna nazar aýdardy.
-Biz úshin asa mańyzdy jańashyldyqtyń biri – mádenıet, ǵylym jáne bilimniń negizgi konstıtýtsııalyq qundylyqtar qataryna engizilýi. Ulttyq mádenıetti memlekettik qoldaý jáne tarıhı-mádenı murany saqtaý alǵash ret memlekettiń asa mańyzdy mindetteriniń biri retinde konstıtýtsııalyq deńgeıde bekitildi. Sonymen qatar Konstıtýtsııada árbir azamattyń tarıhı-mádenı muraǵa uqypty qaraýǵa, tarıh jáne mádenıet eskertkishterin qorǵaýǵa mindetti ekeni naqty kórsetilgen. Bul máni tereń, mańyzy zor ózgeris. Óıtkeni mádenı murany saqtaý – memlekettiń ǵana emes, búkil qoǵamnyń ortaq mindeti ári jaýapkershiligi, – dedi Aıda Balaeva.
Premer-mınıstrdiń orynbasary jańa Konstıtýtsııanyń ıdeıalyq negizinde Memleket basshysy usynǵan «Ádiletti Qazaqstan», «Zań men tártip», «Adal azamat» jáne «Taza Qazaqstan» jalpyulttyq qaǵıdattary jatqanyn atap ótti.
Kezdesý barysynda jańa Konstıtýtsııada otbasy ınstıtýtynyń quqyqtyq negizderi naqtylanyp, qoǵam úshin aıryqsha mańyzy bar qundylyqtardy qorǵaý kepildikteri kúsheıtilgeni de aıtyldy.
Eske sala keteıik, Qazaqstannyń jańa Konstıtýtsııasy 2026 jylǵy 15 naýryzda ótken respýblıkalyq referendým qorytyndysy boıynsha qabyldandy. Qujat 2026 jylǵy 1 shildeden bastap kúshine enedi.
Osyǵan deıin Memleket basshysy Konstıtýtsııanyń uzaq jyl boıy halyq ıgiligine qyzmet etetini týraly aıtqan bolatyn.
