Astanada polıtsııa qyzmetkerin qorqytqan turǵynǵa qatysty úkim shyqty

ASTANA. KAZINFORM – Astana qalasynyń qylmystyq ister jónindegi aýdanaralyq soty bılik ókiline qyzmet barysynda kúsh qoldanamyn dep qorqytqan azamat K.-ǵa qatysty aıyptaý úkimin jarııalady. Ol QR Qylmystyq kodeksiniń 380-baby 1-bóligi boıynsha kináli dep tanyldy.

Sotta anyqtalǵandaı, bıylǵy 15 shildede sottalýshy polıtsııa qyzmetkeriniń tergeýdi jalǵastyrý úshin aýdandyq bólimge barý týraly zańdy talabyna baǵynbaǵan. Ol tártip saqshysyn kúsh qoldanamyn dep aýyzsha qorqytyp, jumysyna kedergi keltirgen.
Bul jaǵdaı sol kúni taǵy qaıtalanyp, K. basqa polıtsııa qyzmetkeri O.-ny da kúsh qoldanamyn dep qorqytqan.

- Sottalýshynyń kinási moıyndaý aıǵaqtarymen, jábirlenýshilerdiń kórsetýlerimen, zattaı dáleldemelermen jáne qylmystyq is materıaldarymen tolyq dáleldendi, - delingen aqparatta.

Prokýror sottalýshyǵa 1 jyl merzimge bas bostandyǵyn shekteý jazasyn surady.
K. kinásin moıyndap, aıyppul túrindegi jaza taǵaıyndaýdy ótindi.

QK 380-baby 1-bóliginiń sanktsııasy 2 000 AEK-ke deıin aıyppul salýdy, túzeý nemese qoǵamdyq jumystarǵa tartýdy, 2 jylǵa deıin bas bostandyǵyn shekteýdi nemese bas bostandyǵynan aıyrýdy qarastyrady.

Sot jeńildetetin mán-jaılar retinde sottalýshynyń kinásin moıyndaýyn, shyn júrekten ókinýin jáne buryn sottalmaǵanyn eskerdi. Aýyrlatatyn mán-jaılar anyqtalǵan joq.

Osyny eskere otyryp, sot K.-ǵa 1 jyl merzimge bas bostandyǵyn shekteý jazasyn taǵaıyndady.

Úkim zańdy kúshine endi.

Aıta keteıik, Shymkentte memlekettik qyzmetshiden 10 mln teńge bopsalady degen kúdikpen bloger ustaldy.