Astanada polıtsııa qyzmetkerleri esirtki saýdasyna tosqaýyl qoıdy

ASTANA. KAZINFORM – Elordada jedel-izdestirý is-sharalary barysynda polıtsııa qyzmetkerleri esirtki quraldaryn zańsyz ótkizýge qatysy bar degen kúdikpen 35 jastaǵy qala turǵynyn ustady.

Polisia.kz taratqan aqparatta, kúdiktiniń tyıym salynǵan zattardy anonımdi messendjerler arqyly taratqany habarlanǵan, 

Turǵylyqty mekenjaıy boıynsha júrgizilgen tintý barysynda as úı shkaftarynan jáne balkonnan erekshe ıisi bar, kannabıs shaıyryna uqsas suıyq konsıstentsııadaǵy zaty bar eki plastık ydys tabyldy. Sondaı-aq erekshe ıisi bar, gashısh maıyna uqsas suıyq zat quıylǵan 200-den astam flakon, erekshe ıisi bar, qoıý qońyr tústi túıirshikti zat — marıhýana salynǵan polıetılen paket tárkilendi. Budan bólek, páterden elektrondy tarazylar men esirtkini bólshektep oraýǵa arnalǵan bos ydystar anyqtaldy. Tárkilengen zattardyń jalpy salmaǵy shamamen 4 kelini qurady.

Atalǵan derek boıynsha esirtki quraldaryn saqtaý jáne ótkizý faktisi boıynsha qylmystyq is qozǵaldy.

Polıtsııa esirtki quraldaryn saqtaý, daıyndaý jáne ótkizý Qazaqstan Respýblıkasynyń zańnamasyna sáıkes qylmystyq jaýapkershilikke ákep soǵatynyn eskertedi.

Eske sala keteıik, buǵan deıin Jambyl oblysynda esirtkini zańsyz saqtaǵan Qordaı turǵyndaryna qatysty úkim shyqqanyn habarlaǵanbyz.