Astanada polıtseılerdiń robot-ıtteri kimderdi «tanyp» qoıa alady
ASTANA. KAZINFORM — Astanada qoǵamdyq qaýipsizdikti qamtamasyz etý jáne quqyq buzýshylyqtyń aldyn alý úshin tórt robot-ıt qoldanysqa engizildi, dep habarlaıdy elorda ákimdiginiń resmı saıty.
Qazirgi ýaqytta robot-ıtter adam kóp shoǵyrlanatyn saýda ortalyqtary men qoǵamdyq oryndarda jumys istep, polıtsııa qyzmetkerlerine qoǵamdyq keńistikterdegi jaǵdaıdy baqylaýǵa kómektesip júr.
Robot-ıtter jasandy ıntellekt tehnologııalarymen jabdyqtalǵan beınekameralar arqyly aınaladaǵy jaǵdaıdy baqylap, beıneaqparatty naqty ýaqyt rejıminde tikeleı Jedel basqarý ortalyǵyna jetkizedi. Bul polıtsııa qyzmetkerlerine qoǵamdyq oryndardaǵy ahýaldy jedel baǵalap, qajetti jaǵdaıda tıisti sharalardy ýaqytyly qabyldaýǵa múmkindik beredi.
— Tehnologııanyń mańyzdy múmkindikteriniń biri — izdeýde júrgen adamdardy anyqtaýǵa kómektesý. Robot-ıtterge ıntegratsııalanǵan jasandy ıntellekt júıesi bet-álpetti sáıkestendiredi. Sáıkestik anyqtalǵan jaǵdaıda Jedel basqarý ortalyǵyna avtomatty túrde dabyl habarlamasy jiberiledi, — delingen habarlamada.
Bul tehnologııa polıtsııanyń jedel áreket etý múmkindigin arttyryp, izdeýdegi adamdardy anyqtaý jumysyna qosymsha qoldaý kórsetedi.
Qaýipsiz qala — tek qoǵamdyq tártipti saqtaý ǵana emes, sonymen qatar yqtımal qaýipterdiń aldyn alý, oqıǵalarǵa ýaqytyly áreket etý jáne árbir azamattyń tynyshtyǵyn qorǵaý.
Buǵan deıin qyrkúıekte Shyǵys Qazaqstan oblysy Ulan aýdanynda robot-ıtter alǵash ret qoǵamdyq tártipti kúzetýge shyǵa bastaǵanyn jazǵanbyz.
