Qazaqstan ınternet jyldamdyǵy boıynsha álemdik reıtıngte kórsetkishin joǵarylatty
ASTANA. KAZINFORM - Ookla analıtıkalyq kompanııasy 2025 jyldyń qańtaryna arnalǵan elder arasyndaǵy jańa ınternet jyldamdyǵy reıtıngin jarııalady.
Atalmysh reıtıngte Qazaqstan óz kórsetkishterin aıtarlyqtaı joǵarylatqan. Elimiz mobıldi ınternet boıynsha 8 pozıtsııaǵa kóterilip, 49-shy orynǵa turaqtaǵan. Mobıldi ınternettiń júkteý jyldamdyǵy 81,58 Mbıt/s, jiberý jyldamdyǵy 18,42 Mbıt/s, al kidiris 18 ms deńgeıinde tirkeldi. Fıksırlengen keńjolaqty ınternet sanatynda Qazaqstan +5 pozıtsııaǵa joǵarylap, 83-orynǵa shyqqan, munda júkteý jyldamdyǵy 77,93 Mbıt/s, jiberý jyldamdyǵy 80,83 Mbıt/s, al kidiris 5 ms boldy.
Bul jetistik memlekettik baǵdarlamalar men baılanys operatorlarynyń telekommýnıkatsııalyq ınfraqurylymdy damytý jónindegi júıeli jumysynyń nátıjesi. Atap aıtsaq, 2024 jyly fıksırlengen baılanys jelileri jańǵyrtylyp, 4G jelisiniń qamtý aımaǵy keńeıtildi, sondaı-aq iri qalalarda 5G tehnologııasyn engizý bastaldy. Osy sharalardyń arqasynda ınternet jyldamdyǵy edáýir artty, bul Qazaqstannyń halyqaralyq deńgeıdegi kórsetkishterin jaqsartýǵa yqpal etti.
«Qoljetimdi ınternet» ulttyq jobasy aıasynda 2025-2027 jyldary kelesi bastamalar júzege asyrylady:
- 3010 aýylda keńjolaqty ınternet jelisin damytý maqsatynda optıkalyq-talshyqty baılanys jelisin tartý;
- 1120 aýylda ınternetti ár úıge deıin jetkizý úshin «sońǵy mılıa» jobasyn sýbsıdııalaý;
- 5G tehnologııasyn respýblıkalyq mańyzy bar qalalarda (Astana, Almaty, Shymkent) jáne oblys ortalyqtarynda keńeıtý;
- 250-den astam shalǵaı jáne sırek qonystanǵan eldi mekenderge spýtnık arqyly ınternet qoljetimdiligin qamtamasyz etý.
Internet jyldamdyǵynyń artýy elimizdiń tsıfrlyq damýyna, IT-ındýstrııanyń ósýine, onlaın bilim berý men elektrondyq kommertsııany ilgeriletýge jáne ekonomıkanyń basqa da mańyzdy salalaryna oń áser etedi. Telekommýnıkatsııa salasyn damytý – Mınıstrliktiń basty basymdyqtarynyń biri. Vedomstvo búkil el boıynsha baılanys pen ınternet sapasyn jaqsartý jumystaryn jalǵastyrady.
Aıta keteıik, Ookla – ınternet jyldamdyǵy men sapasyn taldaýǵa mamandanǵan jetekshi halyqaralyq kompanııa. Ol paıdalanýshylarǵa júkteý jyldamdyǵyn, sondaı-aq keshigýdi ólsheýge múmkindik beretin Speedtest qyzmetimen tanymal. Ookla aı saıyn Speedtest Global Index reıtıngin jasaqtaıdy, onda naqty paıdalanýshylardyń testileri negizinde túrli eldegi mobıldi jáne tirkelgen ınternettiń ortasha jyldamdyǵy salystyrylady. Derekter Speedtest arqyly anonımdi túrde jınalyp, álemdegi ınternet ınfraqurylymynyń naqty jaǵdaıyn kórsetedi.
Buǵan deıin Beeline ınternet baǵasyn qoldan kótergenin jazǵanbyz.