Astanada polıtseıler dropperdiń qylmystyq shemasyn áshkereledi

ASTANA.KAZINFORM – Astanada polıtseıler dropperdiń qylmystyq shemasyn áshkereledi, - dep jazdy Polisia.kz.

Jedel-izdestirý barysynda «Anti-fraud» jedel aldyn alý sharasy aıasynda Kıberqylmysqa qarsy is-qımyl basqarmasynyń qyzmetkerleri 20 jastaǵy dropperdi ustady. Ol qylmystyq topqa shottarǵa qol jetkizý úshin derekter men bank kartalarynyń rekvızıtterin bergen.

Belgili bolǵandaı, bul alaıaqtyq shemaǵa qala turǵyny tap bolǵan. Jábirlenýshige belgisiz nómirlerden qońyraý shalyp, ózin bank qyzmetkeri retinde tanystyrǵan alaıaqtar onyń shotyna kıbershabýyl jasalǵanyn aıtyp, ony boldyrmaý úshin qarajatty qaýipsiz shottarǵa aýdarý kerektigin habarlaǵan.

Jábirlenýshi senip, alaıaqtar kórsetken shotqa 1 mln teńge kóleminde aqsha aýdarǵan. Alaıda aqsha aýdarylǵannan keıin, kúdiktiler baılanysqa shyqpaı qoıǵan. Qylmystyq isti tergeý barysynda elorda kıberpolıtsııa qyzmetkerleri alaıaq kórsetken shottardyń biriniń ıesin jáne onyń ornalasqan jerin anyqtady.

Atalǵan fakti boıynsha qylmystyq is tirkeldi. Polıtseıler ustalǵan azamattyń osyndaı basqa da qylmystarǵa qatysy bar-joǵyn tekserip jatyr.

Qazir kúdikti ustalyp, ýaqytsha ustaý ızolıatoryna qamaldy. Astana qalasynyń Polıtsııa departamenti azamattardy alaıaqtardyń qurbany bolmaý úshin qarapaıym erejelerdi saqtaýǵa shaqyrady.

– Eger sizge belgisiz nómirlerden qońyraý shalyp, ózin bank qyzmetkeri nemese polıtsııa retinde tanystyrsa, áńgimeni toqtatyp, jaqyn mańdaǵy polıtsııa bólimine nemese 102 nómirine habarlasyńyz, - delingen habarlamada.

Buǵan deıin qazaqstandyqtardy aldap kelgen transulttyq qylmystyq top Armenııada ustalǵanyn jazǵan bolatynbyz.