Astanada polıtsııa men medıtsına qyzmetkerleri ustalǵan adamdy óltirip aldy
ASTANA. QazAqparat - Astana qalasynyń prokýratýrasy ustalǵan azamatty óltirip alǵan polıtsııa serjanty men Astana qalasynyń áleýmettik-medıtsınalyq ońaltý ortalyǵynyń qyzmetkerlerine qatysty isti sotqa joldady, dep habarlaıdy «QazAqparat» HAA tilshisi Astana qalasynyń ІІD baspasóz qyzmetine silteme jasap.
«15 naýryz kúni saǵat 03:00 kezinde «102» nómirine qala turǵyndarynan shaǵym kelip túsip, B.Momyshuly kóshesindegi aýlada belgisiz bireý kólikterdiń jaryq shamdaryn shaǵyp ketkenin aıtqan. Oqıǵa ornyna jetken quqyq qorǵaýshylar 29 jastaǵy mas kúıdegi azamatty ustap, ony Astana qalasynyń áleýmettik-medıtsınalyq ońaltý ortalyǵyna jetkizgen. Atalǵan oqıǵa boıynsha QR QK-niń 293-baby boıynsha sotqa deıingi tergeý amaldary bastalǵan bolatyn», - dep habarlaıdy vedomstvodan.
ІІD baspasóz qyzmetiniń habarlaýynsha, ońaltý ortalyǵyna jetkizilgen azamat baǵynbaı, ortalyq qyzmetkerlerine kónbeı, fızıkalyq turǵyda qarsylyq tanytqan. Krıvenkony sabasyna túsirý úshin polıtsııa qyzmetkeri men ortalyqtyń qyzmetkerleri oǵan kúsh qoldanǵan.
«Atalǵan jaıt sotqa deıingi tergeý amaldarynyń biryńǵaı tiziliminde QR 362-baby 4-bóligi (laýazymyn asyrý paıdalaný) jáne 106-baby 3-bóligi (abaısyzda kisi ólimine ákep soqqan qasaqana aýyr túrde dene jaraqatyn keltirý) boıynsha tirkelgen. Birqatar saraptamalar legi taǵaıyndalyp, dál sol kúni Astana ІІD ózindik qaýipsizdik basqarmasymen kúsh qoldanǵan polıtsııanyń kishi serjanty tutqynǵa alyndy. Sonymen birge, Astana qalasynyń áleýmettik-medıtsınalyq ońaltý ortalyǵynyń qyzmetkerleri de ustalǵan», - delingen habarlamada.
Qazirgi ýaqytta Astana qalasynyń prokýratýrasynyń arnaıy prokýrory isti tergep, qorytyndy shyǵarý úshin isti sotqa joldady.
