Astanada polıtsııa men qutqarýshylar kópqabatty úı terezesinen sábılerdi qutqardy

ASTANA. QazAqparat – Elordada qutqarýshylar órt sóndirýge arnalǵan kótergishpen kópqabatty úı terezesine kóterilip, 3 sábıdiń ómirin qutqaryp qaldy, dep habarlaıdy QazAqparat tilshisi.

Astana qalalyq Polıtsııa departamentiniń málimetinshe, Arnasaı kóshesindegi úıdiń turǵyndary «102» nómirine qońyraý shalyp, tórtinshi qabattaǵy ashyq terezeden 2 qyz jáne bir ul balanyń qarap turǵanyn habarlaǵan. Osydan keıin oqıǵa ornyna patrýldik polıtsııa men tótenshe jaǵdaıdar qyzmetiniń qyzmetkerleri jedel jiberilgen.

«Órt sóndirýge arnalǵan kótergishtiń kómegimen qutqarýshylar 3 jáne 5 jastaǵy sábılerge kóterildi. Keıin olardy Esil aýdandyq ıývenaldyq polıtsııa ınspektorlaryna tabys etti. Tekserý barysynda olardyń ata-analarynyń shuǵyl perzenthanaǵa ketkeni anyqtaldy. Óıtkeni, balalardyń anasynda kenetten tolǵaq bastalǵan.

Zańdy ókilderdiń atap ótýinshe, sol ýaqytta balalar uıyqtap jatqan ári der ýaqytynda úıge oralamyz dep úmittengen.

Qazirgi ýaqytta balalardyń jaǵdaıy jaqsy ári ata-analarymen birge. Olarmen aldaǵy ýaqytta mundaı jaıtqa jol bermeý úshin áńgimelesý júrgizildi», - dep atap ótedi departamentten.