Astanada polıtsııa esirtki saýdasymen aınalysqan úsh kúdiktini ustady

NUR-SULTAN. QazAqparat – Elordalyq polıtsııa «Quqyq tártibi» jedel-aldyn alý sharasy aıasynda esirtki satýmen aınalysqan 3 adamnan turatyn toptyń áreketin áshkereledi, dep habarlaıdy QazAqparat Nur-Sultan qalalyq polıtsııa departamentiniń baspasóz qyzmetine silteme jasap.

20 tamyzda buryn sottalǵan 37 jastaǵy elorda turǵyny ustaldy. Odan quramynda 350 gramm «gashısh» bar 5 polıetılendi býma tárkilenip, onyń esirtki zattaryn satýmen aınalysqan eki sybaılasy da qolǵa tústi.

Turǵylyqty mekenjaılary boıynsha tintý júrgizý kezinde quramynda «gashısh» bar 37 polıetılendi býma, elektrondy tarazy jáne 1 mln 165 myń teńge jáne 2260 AQSh dollary somasyndaǵy aqsha tárkilendi.

Sóıtip zańsyz aınalymnan 2,5 kg-nan astam «gashısh» tárkilendi, onyń baǵasy «qara naryqta» 1 mıllıon teńgeni quraıdy.

Atalǵan jaıtqa baılanysty QR QK 296-baby («esirtki zattardy asa iri mólsherde zańsyz saqtaý») jáne QR QK-niń 297-baby («qylmystyq toptyń esirtkilik zattardy asa iri mólsherde sýdalaýy») boıynsha qylmystyq is qozǵaldy.

Ustalǵandar ýaqytsha ustaý ızolıatoryna qamaldy. Tergeý amaldary júrgizilýde.

Jyl basynan beri Nur-Sultan qalasy polıtsııa departamentiniń esirtki qylmysyna qarsy is - qımyl basqarmasynyń qyzmetkerleri 81 qylmystyq isti qozǵady. Olardyń 66-sy esirtki zattaryn saýdalaýmen baılanysty. Zańsyz aınalymnan 45 kg-ǵa jýyq túrli esirtki zattary tárkilenip, 2 jasyryn esirtki zerthanasy anyqtaldy. Sondaı-aq esirtki satýshylar tutynýshylardy tartqan 188 saıt buǵattaldy.