Astanada polıtseıleri kólikte tolǵatyp jatqan áıeldiń ómirin qutqaryp qaldy
ASTANA. QazAqparat - Astana qalalyq ІІD JPQ jol-patrýldik polıtsııa polkiniń ınspektorlary bosanyp jatqan áıeldiń ómirin qutqaryp qaldy. Olar ishinde bolashaq ana bolǵan kólik úshin eskort uıymdastyrdy. Sonyń arqasynda áıel aýrýhanaǵa ýaqtyly jetkizilgen. Bul týraly elordalyq ІІD-niń Jergilikti polıtsııa qyzmetinen habarlady.
26 qańtardyń túngi saǵat 3-tiń shamasynda Bógenbaı batyr dańǵyly aýdanyndaǵy «Yrǵyz-151» kólik patrýliniń quramynda qoǵamdyq tártip pen jol qaýipsizdigin qorǵaý boıynsha qyzmet júrgizip júrgen Astana qalalyq ІІD JPQ JPP polkiniń polıtseıleri - polıtsııanyń kishi serjanty Bekzat Aıdarov pen qatardaǵy qyzmetker Ashat Qasymovqa jeńil kóliktiń júrgizýshisi keldi.
Ol jolda apasynyń tolǵaǵy bastalyp, ony dereý perzenthanaǵa jetkizý qajet ekenin habarlady. Er adam medıtsınalyq mekemege barar joldy bilmegen, sebebi elordaǵa Aqmola oblysyndaǵy Astrahanka aýdanynyń Pervomaıka aýylynan taıaýda ǵana kóship kelgen.
«Kishi serjant Aıdarov pen onyń áriptesi jaǵdaıdy tez baǵalap, bolashaq anany medıtsınalyq mekemege aparý týraly sheshim qabyldady. Ol úshin dabyl qurylǵylarynyń kómegimen júkti áıel otyrǵan kólik úshin jolda kedergisiz júrý sharasy uıymdastyryldy», - dep málimdedi Astananyń jergilikti polıtsııasynan. Inspektorlar áıeldi №2 Perınataldyq ortalyqqa deıin jetkizip, ony dárigerlerge tapsyrdy.
Áıel sátti bosandy. Ol dúnıege úshinshi qyzyn ákelip, onyń esimin Veronıka dep qoıǵan.
Áıeldi bosandyrǵan medıtsınalyq qyzmetkerlerdiń pikirinshe, jańa týǵan náreste men anasynyń ómirin birneshe mınýt qana saqtap qalǵan.
Perzenthanadan shyqqan kezde 37 jastaǵy Aleksandra Karaseva men onyń aǵasy bul shuǵyl jaǵdaıda ómirlik mańyzdy kómek kórsetken polıtseılerge alǵysyn bildirdi.
